Rabitə və informasiya texnologiyaları naziri Əli Abbasov Türkiyə Respublikasının ölkəmizdə yeni təyin olunmuş səfiri İsmail Alper Coşkun ilə görüşmüşdür.

AzərTAc xəbər verir ki, ölkələrimiz arasında informasiya texnologiyaları sahəsində yüksək əməkdaşlığın qurulduğunu qeyd edən nazir Əli Abbasov bu münasibətlərin ölkə iqtisadiyyatında xüsusi yer tutduğunu, gələcəkdə əməkdaşlığın daha da dərinləşdiriləcəyini bildirmişdir.

Azərbaycanda informasiya-kommunikasiya texnologiyaları  sektorunda aparılan islahatlar, həyata keçirilən genişmiqyaslı, milli və beynəlxalq layihələri xatırladan səfir layihələrin icrasının Türkiyə üçün də səmərəli olacağına ümid etdiyini vurğulamışdır. İsmail Alper Coşkun demişdir: “Azərbaycanın BMT tərəfindən koordinator təyin edildiyi TASİM (Trans-Avrasiya Super İnformasiya Magistralı) layihəsi ”Türk Telekom"un da marağındadır. Gələcəkdə bununla bağlı Azərbaycan tərəfinin hər hansı yardıma ehtiyacı olarsa, Türkiyə bu köməyi göstərmək niyyətindədir".

Səfir həmçinin cari ildə Azərbaycanda VII İnternet İdarəçilik Forumunun, “BakuTel-2012" Beynəlxalq informasiya və telekommunikasiya texnologiyaları sərgisinin yüksək səviyyədə təşkilini qeyd etmiş, eləcə də 2013-cü ildə Azərbaycanın ilk peykinin orbitə çıxarılmasını əhəmiyyətli hadisə kimi qiymətləndirmişdir.

Ötən 10 ildə Türkiyənin yüksək sürətlə inkişaf etdiyini, beynəlxalq birlikdə iqtisadi gücə çevrildiyini, TASİM layihəsinin BMT qətnaməsinə daxil edilməsində bu ölkənin xüsusi rolu olduğunu xatırladan Ə.Abbasov öz növbəsində bu istiqamətdə əməkdaşlığın daha da genişləndiriləcəyini diqqətə çatdırmışdır.