İyunun 29-da Azərbaycanın sənaye və energetika nazirinin müavini Natiq Abbasov Fransanın GDF SUEZ şirkətinin prezidenti və baş direktorunun müavini, AVROQAZ-ın prezidenti Jan-Fransua Sirellinin başçılıq etdiyi nümayəndə heyəti ilə görüşmüşdür.
Nazirliyin mətbuat xidmətindən verilən məlumata görə, qitənin ən məşhur qaz təchizatçılarından biri olan GDF SUEZ Fransanın milli qaz şirkətidir. Avropaya qaz nəqlinin 30 faizi bu şirkətin payına düşür. GDF SUEZ ildə qitəyə 100 milyard kubmetr "mavi yanacaq" gətirir. Bu həcmin 40 faizi Norveçdən, 20 faizi Rusiyadan, qalan 40 faizi isə Misir Ərəb Respublikası, Əlcəzair və Niderlanddan alınır.
Görüşdə Jan-Fransua Sirelli bildirmişdir ki, şirkət Azərbaycandan da böyük həcmdə qaz almaqda maraqlıdır. GDF SUEZ şirkəti yaxın gələcəkdə həyata keçiriləcək "Şahdəniz-2" layihəsi çərçivəsində Azərbaycandan böyük həcmdə qazın Avropaya çatdırılmasında iştirak etmək niyyətindədir.
Qeyd etmək lazımdır ki, hazırda şirkət "Abşeron" perspektiv strukturunda kəşfiyyat və qazma işləri də aparır. Bu istiqamətdə şirkət tərəfindən 200 milyon ABŞ dolları məbləğində vəsaitin xərclənməsi nəzərdə tutulur.