2012-ci ilin ən yaxşı şirkətləri  “İlin Şirkəti” Milli Mükafatının təqdimetmə mərasimi  “Jumeirah Bilgah Beach Hotel”də keçirildi. Bu il ölkə biznesinin və iqtisadiyyatının müxtəlif sahələrində çalışan 26 şirkət mükafatın laureatı oldu.

Onların sırasında özlərini təsdiq etmiş maliyyə institutları və milli korporasiyalarla yanaşı, bazarda bu il yaranmış yeni adlar da var idi. Mükafata layiq görülən  şirkətlər yüksək rentabelli, sabit mövqeyə malik və intensiv inkişaf edən, maliyyə şəffaflığı və informasiya açıqlığı üzrə beynəlxalq standartları tətbiq edənlərdir. “İlin Şirkəti” adı şirkətlərin fəaliyyəti ərzində qazandığı uğurlara görə yox, son ildə əldə etdiyi nailiyyətlərə görə qiymətləndirən unikal alətdir.

 -Biz qaliblərin müəyyən olunmasının seçimi qaydalarına sadiq qalırıq–deyə təqdimetmə mərasimində çıxış edən mükafatın təşkilat komitəsinin rəhbəri İbrahim Baharov qeyd etdi ki, mükafata layiq görülən şirkətlər öz sahələrinin flaqmanları olmaqla yanaşı, uğurlu bir inkişaf yolu keçərək digər şirkətlərə də nümunə olublar. Nominantların siyahısı ölkənin qeyri-neft sektorunun xeyli inkişaf etdiyini göstərərdi ki, bu da Azərbaycanın iqtisadi inkişafının düzgün və balanslı şəkildə həyata keçirilməsinə növbəti sübutdur.

 Xatırladaq ki, “İlin Şirkəti” mükafatı 2000-ci ildə nüfuzlu işgüzar jurnal olan “Consulting&Business” tərəfindən təsis edilib və hər ilin sonunda təqdim olunur.

“Xalq qəzeti”