Dekabrın 10-da Azərbaycan Respublikasının maliyyə naziri Samir Şərifov Bakıda səfərdə olan Asiya İnkişaf Bankının (AİB) Mərkəzi və Qərbi Asiya departamentinin direktoru Klaus Gerhauzerin rəhbərlik etdiyi nümayəndə heyəti ilə görüşmüşdür. 

Nazirliyin mətbuat xidmətindən AzərTAc-a bildirmişlər ki, görüşdə AİB ilə Azərbaycan arasında birgə əməkdaşlıq istiqamətləri, o cümlədən elektrik enerjisi istehsalı, müasir tələblərə cavab verən yol-nəqliyyat infrastrukturunun yaradılması, su təchizatı və kanalizasiya sistemlərinin tikilməsi və yenidən qurulması istiqamətində həyata keçirilən layihələr barədə müzakirələr aparılmışdır. Görüşdə, həmçinin bankın mütəxəssisləri tərəfindən Azərbaycan üzrə hazırlanan 2013-2018-ci illəri əhatə edəcək 5 illik yeni strategiya barədə də fikir mübadiləsi olmuşdur.

K.Gerhauzer təmsil etdiyi qurumun Azərbaycanda infrastruktur layihələrinin maliyyələşdirilməsinə bundan sonra da vəsait ayırmaqda maraqlı olduğunu bildirmişdir.