Azərbaycanın xarici ticarət dövriyyəsində ixracın xeyli hissəsini neft və neft məhsulları təşkil edir. Bu tendensiya 2012-ci ilin ötən dövründə də davam etmişdir. Belə ki, cari ilin on bir ayı ərzində ölkəmizdən dünya bazarlarına 22 milyon 966 min 568 ton xam neft ixrac olunmuşdur. Bu ilin noyabr ayında dünya bazarında xam neftin qiymətləri isə nisbətən sabit qalmışdır. Bütövlükdə isə ötən ay dünya bazarında “Brent” tipli xam neftin 1 barreli 109,11 dollara, “Urals” nefti 108,22 dollara, BTC FOB Ceyhan tipli xam neft isə 110,68 dollara satılmışdır.

Bu ilin noyabr ayında Azərbaycandan ixrac olunmuş neft məhsullarının həcmində də artım müşahidə ounmuşdur. Belə ki, hesabat dövründə Dövlət Neft Şirkətinin Marketinq və İqtisadi Əməliyyatlar İdarəsi  tərəfindən 79 min 3 ton dizel yanacağı, 4 min 59 ton təyyarə yanacağı, 51 min 785 ton vakum qazoylu ixrac edilmişdir. Ümumilikdə isə 2012-ci ilin yanvar-noyabr ayları ərzində ölkəmizdən dünya bazarlarına  840 min 284 ton dizel yanacağı, 121 min 419 ton təyyarə yanacağı, 82 min 892 ton vakum qazoylu göndərilmişdir. Yeri gəlmişkən, bu ilin noyabr ayında dünya bazarında avtomobil benzininin qiyməti (1 ton üçün) - 932,31 dollar, təyyarə yanacağının - 989,13 dollar, dizel yanacağının - 924,73 dollar, 1 faizli kükürdlü mazutun qiyməti isə 608,55 dollar təşkil etmişdir.

M. YAQUBZADƏ,
“Xalq qəzeti”