Dekabrın 6-da Bakı Biznes Mərkəzində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan-İtaliya biznes forumu keçirilmişdir.

AzərTAc xəbər verir ki, tədbirdə AZPROMO ilə İtaliya-Azərbaycan Ticarət İnstitutu, Azərbaycan Sahibkarlar (İşəgötürənlər) Təşkilatları Milli Konfederasiyası ilə İtaliya-Azərbaycan Ticarət İnstitutu, həmçinin Azərbaycanın “ASPİ Holdinq” şirkəti ilə İtaliyanın “Usque ad Finem” şirkəti arasında əməkdaşlıq haqqında memorandumlar imzalanmışdır.

AZPROMO-nun rəhbəri Rüfət Məmmədov uğurla həyata keçirilən sosial-iqtisadi islahatlar nəticəsində Azərbaycanda sahibkarlıq fəaliyyətinin genişləndiyini, əlverişli biznes və investisiya mühitinin yaradıldığını, ölkəmizin investisiya ixrac edən ölkəyə çevrildiyini diqqətə çatdırmış, italiyalı iş adamlarını fəal əməkdaşlığa dəvət etmişdir.

Azərbaycanın İtaliyadakı səfiri Vaqif Sadıqov və İtaliyanın Azərbaycandakı səfiri Mario Baldi iki ölkə arasındakı əlaqələr və əməkdaşlığın genişləndirilməsi perspektivləri barədə məlumat vermişlər.

İtaliya-Azərbaycan Ticarət İnstitutunun rəhbəri Manuela Traldin, İtaliya Ticarət Komissiyasının Bakı nümayəndəsi Ferdinand Pastor ölkələrimiz arasındakı iqtisadi-ticarət əlaqələri, iş adamlarının əməkdaşlığı və perspektiv sahələr barədə danışmışlar.

Biznes forumda Azərbaycanın biznes və investisiya imkanlarına, İtaliyanın iqtisadiyyatına və investisiya imkanlarına dair təqdimatlar keçirilmiş, iş adamları arasında ikitərəfli görüşlər təşkil edilmişdir.

Tədbirdə Azərbaycan və İtaliya tərəfindən rəsmi şəxslərlə yanaşı, sənaye, tikinti, İKT, mebel istehsalı, mədəniyyət, turizm, bankçılıq və s. sahələrdə fəaliyyət göstərən 100-dən çox iş adamı iştirak etmişdir.