Noyabrın 22-də Rumıniyanın Əmək, Ailə və Sosial Müdafiə Nazirliyi ilə Heydər Əliyev Fondunun Rumıniya nümayəndəliyi arasında əməkdaşlıq müqaviləsi imzalanmışdır. 
Tədbirdə əmək, ailə və sosial müdafiə naziri xanım Mariana Kampeanu, Heydər Əliyev Fondunun Rumıniya nümayəndəliyinin direktoru İqbal Hacıyev, nazirliyin müşaviri Denisa Patraşku, nazirliyin tərkibində olan Əlillər və Uşaqların Müdafiəsi Departamentinin rəisi Anca Negoie, Azərbaycan Respublikasının Rumıniyadakı səfirliyin 3-cü katibi Anar Şükürov, habelə Rumıniya dövlət KİV-lərinin nümayəndələri iştirak etmişdirlər.
İqbal Hacıyev Rumıniyada Heydər Əliyev Fondunun fəaliyyəti barədə iştirakçılara ətraflı məlumat vermiş və yeni imzalanmış əməkdaşlıq sazişinin Rumıniyada humanitar layihələrin həyata keçirilməsi üçün böyük dəstək olmasını vurğulamışdır. M.Kampeanu Heydər Əliyev Fondunun Rumıniyadakı fəaliyyətini yüksək qiymətləndirdiyini bildirmişdir. M.Kampeanu yeni imzalanmış sazişin iki xalq arasında olan dostluq münasibətlərinin daha da möhkəmlənməsinə xidmət edəcəyini vurğulamışdır.
Tədbirin sonunda M.Kampeanuya Heydər Əliyev Fondu tərəfindən hazırlanmış suvenirlər təqdim edilmişdir.

AzərTAc Buxarest