Noyabrın 19-da rabitə və informasiya texnologiyaları naziri Əli Abbasov ABŞ-ın İllinoys ştatının Nümayəndələr Palatasının spikeri Maykl Madiganla görüşmüşdür. 
Nazirliyin mətbuat xidmətindən AzərTAc-a bildirmişlər ki, Ə.Abbasov Azərbaycanın ümumi iqtisadi nailiyyətləri, informasiya texnologiyaları sahəsində görülən işlər, Rabitə və İnformasiya Texnologiyaları Nazirliyinin əsas fəaliyyət istiqamətləri barədə qonaqlara ətraflı məlumat vermişdir. Noyabrın 6-dan 9-na kimi Birləşmiş Millətlər Təşkilatı və Azərbaycanın birgə təşkilatçılığı ilə VII İnternet İdarəçiliyi Forumunun Bakıda keçirildiyini xatırladan Ə.Abbasov bildirmişdir ki, bu beynəlxalq tədbirdə iştirak edən mütəxəssislər ölkəmizdə internetdən azad şəkildə istifadə olunduğunu qeyd etmişlər.
Nazir ölkə əhalisinin 65 faizinin internet, 30 faizinin isə genişzolaqlı internet istifadəçisi olduğunu bildirmişdir.
Genişzolaqlı internet xidmətlərinin ölkənin bütün ərazisində tətbiq olunması istiqamətində aparılan işlərin qısa müddət ərzində başa çatdırılması, elektron xidmətlərin daha da genişləndirilməsi, ilk telekommunikasiya peykinin yaxın zamanlarda orbitə buraxılması, eləcə də digər milli və regional layihələrdən söz açan Ə.Abbasov İnformasiya Texnologiyalarının İnkişafı Dövlət Fondunun fəaliyyəti ilə internetin inkişafında "start-up" - kiçik, modern müəssisələrin yaradılmasına dəstək veriləcəyini və bu sahənin daha da inkişaf etdiriləcəyini diqqətə çatdırmışdır.
Ölkəmizin uğurlarını müsbət qarşılayan Maykl Madigan İllinoys ştatında, o cümlədən də Çikaqo şəhərində aparılan işlər barədə məlumat vermişdir.
Görüşdə, həmçinin Azərbaycanın İnformasiya Texnologiyaları Fondu ilə İllinoys ştatının maliyyə fondları və mərkəzləri ilə gələcək əməkdaşlıq məsələləri müzakirə olunmuşdur.