Azərbaycan Respublikasının maliyyə naziri Samir Şərifov noyabrın 15-də Bakıda səfərdə olan Beynəlxalq Valyuta Fondunun (BVF) Yaxın Şərq və Orta Asiya Ölkələri Departamentinin direktoru Masud Əhmədin rəhbərlik etdiyi nümayəndə heyəti ilə görüşmüşdür.
Görüşdə Azərbaycan iqtisadiyyatının perspektivləri, ölkənin iqtisadi siyasətindəki prioritetləri, qeyri-neft sektorunun inkişafı, həmçinin BVF-nin Azərbaycan hökumətinə göstərəcəyi texniki yardımın istiqamətləri barədə müzakirələr aparılmışdır.
Azərbaycan hökuməti ilə BVF arasında çox səmərəli və işgüzar əlaqələrin mövcud olduğunu məmnunluqla qeyd edən Məsud Əhməd ölkədə iqtisadi sabitliyin qorunub saxlanılması və inkişafın təmin olunması üçün həyata keçirilən tədbirlərin təmsil etdiyi qurum tərəfindən dəstəkləndiyini vurğulamışdır.
Tərəflər Azərbaycanla BVF arasında məsləhətləşmələri çərçivəsində səmərəli dialoqun davam etdirilməsi, eyni zamanda ölkənin prioritetləri ilə bağlı konkret sahələr üzrə orta və uzunmüddətli texniki yardımın göstərilməsi, iqtisadi inkişafın perspektivlərinin qiymətləndirilməsi və digər məsələlərlə bağlı da məsləhətləşmələr aparmışlar.
Xatırladaq ki, bu, BVF-nin Yaxın Şərq və Mərkəzi Asiya Departamentinin rəhbəri Masud Əhmədin Azərbaycana ilk səfəridir.