İyunun 24-də Bakıda, Gülüstan Sarayında Azərbaycanın iqtisadi inkişaf naziri Şahin Mustafayev və İslam İnkişaf Bankı (İİB) Qrupunun prezidenti Əhməd Məhəmməd Əli İİB Qrupunun 35-ci illik toplantısının yekunları ilə bağlı mətbuat konfransı keçirmişlər.
Ş.Mustafayev demişdir ki, İİB Qrupunun 35-ci illik toplantısının Bakıda keçirilməsi ölkəmizə artan marağın göstəricisidir. Toplantı çərçivəsində keçirilən bir sıra forum, simpozium, seminar və konfranslar Azərbaycan iqtisadiyyatının inkişafında müsbət rol oynayacaqdır. Ş.Mustafayev toplantıda İİB-in üzvü olan 56 ölkədən 950-dan artıq yüksək səviyyəli nümayəndənin iştirakının ölkəmiz ilə yaxından tanışlıq baxımından faydalı olduğunu diqqətə çatdırmışdır. Nazir, həmçinin 35-ci illik toplantı çərçivəsində qəbul olunmuş qərarların islam ölkələrinin inkişafına daha böyük təkan verəcəyinə əmin olduğunu bildirmişdir.
İslam İnkişaf Bankı Qrupunun prezidenti Əhməd Məhəmməd Əli 35-ci illik toplantının yüksək səviyyədə təşkil edilməsi üçün göstərdiyi dəstəyə görə Prezident İlham Əliyevə minnətdarlığını bildirmişdir. Qurumun prezidenti Azərbaycanda tədbir iştirakçılarına göstərilən qonaqpərvərliyi yüksək qiymətləndirmişdir. İİB-in Azərbaycan ilə əməkdaşlığa böyük önəm verdiyini qeyd edən Əhməd Məhəmməd Əli qurumun Azərbaycanda enerji sahəsində bir sıra uğurlu layihələr həyata keçirdiyini vurğulamışdır. Bu layihələr sırasında Mingəçevir Su Elektrik Stansiyasının bərpası, "Xaçmaz" yarımstansiyasının inşası və "Cənub" elektrik stansiyasının tikintisi xüsusi əhəmiyyətə malikdir. Tədbir çərçivəsində aparılmış müzakirələrin İİB-ə üzv olan ölkələr arasında əməkdaşlığın daha da inkişaf etdirilməsi baxımından əhəmiyyətli olduğu vurğulanmışdır. Əhməd Məhəmməd Əli 35-ci illik toplantının sonunda Azərbaycan hökuməti ilə imzalanmış sənədlərin də uğurlu olacağına əminliyini ifadə etmişdir.
Sonda jurnalistlərin sualları cavablandırılmışdır.{nl}