Gələn il Azərbaycan Respublikası Dövlət Neft Fondu (ARDNF) Trans-Anadolu qaz kəmərinin (TANAP) və Bakı şəhərinin Qaradağ rayonunda neft-kimya kompleksinin tikintisini maliyyələşdirəcəkdir.
Bu sözləri Milli Məclisin komitələrinin noyabrın 6-da keçirilmiş birgə iclasında "Azərbaycan Respublikasının 2013-cü il dövlət büdcəsi haqqında" qanun layihəsi və büdcə zərfinə daxil olan digər sənədlərin müzakirəsində ARDNF-in icraçı direktoru Şahmar Mövsümov demişdir.
Ş. Mövsümov bildirmişdir ki, 2013-cü ildə ARDNF qaçqınların və məcburi köçkünlərin sosial vəziyyətinin yaxşılaşdırılmasına 300, Samur-Abşeron su kanalının tikintisinin başa çatdırılmasına 27, Bakı-Tbilisi-Qars dəmir yolunun çəkilişinə 138, Azərbaycan gənclərinin xaricdə təhsil almaları üçün isə 34 milyon manat maliyyə vəsaiti ayıracaqdır.
ARDNF 2013-cü ildə investisiya layihələrini maliyyələşdirmək üçün 2 milyard 149 milyon manat maliyyə vəsaiti ayıracaqdır.

AzərTAc