Azərbaycanda 1871-2011-ci illərdə ümumilikdə 2,015 milyard ton neft (qaz kondensatı daxil olmaqla) hasil olunmuşdur.
"APA-ECONOMICS"in Dövlət Statistika Komitəsinin dərc etdiyi "Azərbaycanın energetikası - 2012" hesabatına istinadən verdiyi məlumata görə, 1871-ci ildə ölkədə cəmi 19 min ton neft hasil olunmuşdursa, 141 ildən sonra, yəni 2011-ci ildə Azərbaycan neft hasilatını 45,6 milyon tona çatdırıb. Ölkədə neft hasilatının rekord göstəricisi isə 2010-cu ilə təsadüf edib. Belə ki, həmin il Azərbaycanda 50,8 milyon ton neft hasil olunub.
Ölkə hökumətinin 2013-cü il üçün proqnozlaşdırdığı neft hasilatını nəzərə alsaq (43,2 milyon ton), görmək olar ki, növbəti ildə də ölkənin neft hasilatında azalma qeydə alınacaq. Ümumiyyətlə, Azərbaycanın təsdiq olunmuş neft ehtiyatları 7 milyard barel, ilkin çıxarılan ehtiyatları 29,9 milyard barel, toplam hasilat 11,7 milyard barel, qalan ehtiyatlar 18,2 milyard barel həcmində qiymətləndirilir.
Qeyd edək ki, Azərbaycanda neft hasilatının ilk mərhələsi 1847-ci ildən neftin mexaniki üsulla qazılmış quyulardan hasil edilməsi ilə başlayıb və 1920-ci ilə kimi davam edib, 1847-1848-ci illərdə ilk dəfə "Bibiheybət" və sonra "Balaxanı" yataqlarında mexaniki üsulla qazılmış quyulardan sənaye əhəmiyyətli neft alınıb və həmin ildən də Azərbaycanın neft sənayesinin inkişafı başlayıb.