Oktyabrın 23-də Azərbaycan Respublikasının Mərkəzi Bankı yanında Maliyyə Monitorinqi Xidməti (MMX) ABŞ-ın Beynəlxalq İnkişaf Agentliyi (USAID) ilə əməkdaşlıq çərçivəsində müxtəlif dövlət və maliyyə təşkilatlarına özünün yeni elektron-tədris (e-tədris) sistemini təqdim etmişdir.
Tədbiri açan Maliyyə Monitorinqi Xidmətinin direktoru Adışirin Qasımov qeyd etmişdir ki, MMX bu sistemi USAID-in Azərbaycandakı missiyası ilə birgə hazırlamışdır. E-tədris sisteminin məqsədi çirkli pulların yuyulması/terrorçuluğun maliyyələşdirilməsinə qarşı mübarizə (PY/TMM) və onun tələbləri ilə bağlı məlumat və biliklərin daha geniş kütləyə daha səmərəli metodlarla çatdırılmasıdır.
Bütün ölkədə PY/TMM ilə bağlı ictimaiyyətin hüquqi mədəniyyətinin və institusional potensialın gücləndirilməsində bu qəbildən olan proqressiv alətlər əhəmiyyətli rol oynayır.
USAID-in Azərbaycandakı missiyasının direktoru Maykl Qrin pulların yuyulmasına qarşı mübarizədə əsas elementlərdən biri kimi bilik əldə edilməsinin və onunla bölüşmənin vacib olduğunu vurğulamışdır. O, əlavə etmişdir ki, e-tədris sistemi materialları öyrənmək üçün insanlara stimul yaradır və rəsmi təlimdən keçmək, sual-cavabda iştirak etmək və nəticə olaraq terrorçuluğun maliyyələşdirilməsinə qarşı mübarizə üzrə ekspert olmaq imkanı verir.
Tədbir çərçivəsində MMX-nin direktor müavini Anar Salmanovun müəllifi olduğu və bu yaxınlarda dərc edilmiş "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında Azərbaycan Respublikası Qanununun Kommentariyası" adlı kitabı da təqdim edilmişdir. Kitab USAID-in maliyyə dəstəyi ilə dərc edilmişdir.

AzərTAc