Azərbaycan Respublikası Maliyyə Nazirliyinin Dövlət Xəzinədarlığı Agentliyində tətbiq edilən "Xəzinədarlığın İnformasiya İdarəedilməsi Sistemi" (XİİS) layihəsi Almaniyanın "SAP AG" şirkəti tərəfindən "SAP Quality Award 2012 for CİS" (Gold Winner) qızıl mükafatına layiq görülmüşdür.
Nazirliyin mətbuat xidmətindən AzərTAc-a bildirmişlər ki, Dövlət Xəzinədarlığı Agentliyində dünya miqyasında geniş tətbiq edilən, biznes proseslərinin idarə olunmasında mütərəqqi proqram təminatı hesab olunan SAP ERP həlli əsasında "Xəzinədarlığın İnformasiya İdarəedilməsi Sistemi" tətbiq olunmuşdur.
Qiymətləndirmənin kriteriyaralarına SAP-ın keyfiyyət prinsipinə əməl olunması parametri, effektivlik, həmçinin layihələrin unikal xüsusiyyətləri nəzərə alınmaqla tətbiqin rentabelliyi və məcmu dəyəri kimi əsas göstəricilər daxildir. İnformasiya Sisteminin yaradılmasının əsas hədəfləri xəzinədarlıq vasitəsilə büdcə xərclərinin icra mexanizminin təkmilləşdirilməsi, dövlət büdcəsinə daxil olan vəsaitlərin avtomatik uçotunun qurulması, onların daha səmərəli istifadə edilməsi, bu sahədə şəffaflığın artırılması, risklərin minimallaşdırılması və pul vəsaitlərinin çevik idarə olunması, məlumatların daha operativ emal edilməsindən ibarətdir.
SAP AG şirkəti idarəetmədə tətbiq olunan proqram təminatı üzrə dünyanın qabaqcıl şirkətlərindən biri olaraq 25-dən artıq sahədə xidmət göstərir. Şirkətin 120 ölkədə 82 mindən çox müştərisi vardır.