İyunun 22-də Bakıda, "Gülüstan" Sarayında Milli İnkişaf Maliyyə İnstitutları Assosiasiyası (ADFIMI) "Kənd təsərrüfatının maliyyələşdirilməsində yeni istiqamətlər" mövzusunda seminar keçirmişdir.
Tədbirdə İslam ölkələrində kənd təsərrüfatının inkişaf etdirilməsi, mövcud problemlər və onların həlli yolları, ərzaq təhlükəsizliyi, yoxsulluğun səviyyəsinin azaldılması məsələləri müzakirə edilmişdir.
Seminarda çıxış edən İslam İnkişaf Bankının (İİB) əməliyyatlar siyasəti və xidmətlər bölməsinin direktoru Məhəmməd əl-Saati yüksək qonaqpərvərliyə görə Azərbaycan rəhbərliyinə minnətdarlıq etmişdir. Qonaq bildirmişdir ki, kənd təsərrüfatının inkişaf etdirilməsi yoxsulluğun səviyyəsinin azaldılmasında böyük rol oynayır. Müasir dövrdə kənd təsərrüfatı sahəsinin mühüm dəyişikliklərə məruz qaldığını qeyd edən Məhəmməd əl-Saati bu sahədə İİB və ADFIMI arasında əməkdaşlığın mühüm əhəmiyyətə malik olduğunu diqqətə çatdırmışdır.
ADFIMI Məşvərət Komitəsinin sədri Zainul Arif Hüseyn kənd təsərrüfatında sərmayələrin artırılmasının zəruriliyini vurğulamışdır. Bildirmişdir ki, aqrar sektorda rəqabətliliyin artırılması üçün əlverişli şərait yaradılmalıdır. Qonaq, həmçinin ərzaq istehsalında özəl sektorun rolunun artırılmasının, qida sənayesinin inkişafının, kənd təsərrüfatında yüksək texnologiyanın tətbiqinin əhəmiyyətini vurğulamışdır.
Digər çıxış edənlər maliyyə risklərinin azaldılması, ərzaq qiymətlərinin sabitləşdirilməsi ilə bağlı tədbirlərin görülməsini zəruri hesab etmişlər.
Seminar müvafiq məruzələrlə davam etmişdir.
AzərTAc