Özbəkistanın Baş nazirinin müavini Uluqbəy Rozuqulovun rəhbərlik etdiyi nümayəndə heyətinin Azərbaycana səfəri çərçivəsində oktyabrın 11-də Bakıda Azərbaycan-Özbəkistan biznes forumu keçirilmişdir.
İqtisadi İnkişaf Nazirliyinin dəstəyi, AZPROMO-nun təşkilatçılığı ilə keçirilən tədbirdə kənd təsərrüfatı və qida sənayesi, ağır sənaye, toxuculuq, tikinti materialları və kənd təsərrüfatı texnikasının istehsalı və digər sektorları təmsil edən iş adamları iştirak etmişlər.
Forumda Azərbaycanın iqtisadi inkişaf naziri Şahin Mustafayev çıxış etmişdir. İki ölkə arasında əlaqələrin dinamik və uğurla inkişaf etdiyini bildirən nazir vurğulamışdır ki, Azərbaycan və Özbəkistan arasında əlaqələr strateji tərəfdaşlıq səviyyəsinə çatmışdır.
Özbəkistanın Baş nazirinin müavini Uluqbəy Rozuqulov hər iki ölkənin böyük iqtisadi potensiala malik olduğunu və ölkəsinin Azərbaycanla ikitərəfli əlaqələrin genişləndirilməsində maraqlı olduğunu demişdir.
AZPROMO-nun rəhbəri vəzifəsinin icraçısı Rüfət Məmmədov ölkəsinin biznes və investisiya imkanlarına, Özbəkistanın Xarici İqtisadi Əlaqələr, İnvestisiyalar və Ticarət Nazirliyinin idarə rəisi Mahmud Xacimetov iki ölkə arasındakı əməkdaşlıq əlaqələrinə dair təqdimatlarla çıxış etmişlər.
Tədbir ikitərəfli görüşlərlə davam etmişdir.

AzərTAc