Sentyabrın 17-də Azərbaycan Xarici İşlər Nazirliyində Azərbaycan Respublikası və Özbəkistan Respublikası xarici işlər nazirlikləri arasında siyasi məsləhətləşmələr keçirilmişdir.
Azərbaycan nümayəndə heyətinə xarici işlər nazirinin müavini Xələf Xələfov, Özbəkistan nümayəndə heyətinə isə bu ölkənin xarici işlər nazirinin müavini Komil Rəşidov başçılıq etmişlər.
Görüşdə Xələf Xələfov iki ölkə arasında mövcud münasibətlərin yüksək səviyyəsindən məmnunluq ifadə etmiş, mövcud əməkdaşlığın bir sıra sahələrdə, o cümlədən mədəniyyət, təhsil və humanitar sahələrdə daha da genişləndirilməsinin vacibliyini bildirmişdir.
X.Xələfov Azərbaycanın dinamik inkişaf etdiyini, Cənubi Qafqaz regionunda aparıcı iqtisadiyyata malik olduğunu nəzərə çatdırmışdır.
Ermənistan-Azərbaycan, Dağlıq Qarabağ münaqişəsi haqqında qonağı ətraflı məlumatlandıran nazir müavini münaqişənin regionda əməkdaşlığa böyük maneə olduğunu qeyd etmiş və Ermənistanın münaqişənin sülh yolu ilə həlli istiqamətində aparılan danışıqları süni şəkildə uzatmağa çalışdığını bildirmişdir. Mövcud status-kvonun qəbulolunmaz olduğunu qarşı tərəfin diqqətinə çatdıran X.Xələfov demişdir ki, regionda davamlı sülh və stabilliyin təmin olunması üçün Ermənistan silahlı qüvvələrinin işğal olunmuş Azərbaycan ərazilərindən çıxarılması əsas şərtdir.
Özbəkistanın xarici işlər nazirinin müavini Komil Rəşidov ölkəsinin Ermənistan-Azərbaycan münaqişəsində, hər zaman olduğu kimi, Azərbaycanın ərazi bütövlüyünü dəstəklədiyini vurğulamışdır.
Eyni zamanda K.Rəşidov iki ölkə xalqları arasında qardaşlıq münasibətlərini yüksək qiymətləndirmişdir. Azərbaycanda gedən sürətli inkişaf haqqında təəssüratlandığını bildirən K.Rəşidov iki ölkə arasında nəqliyyat və infrastruktur, ticarət, enerji, hüquq-mühafizə sahələrində əməkdaşlığın əhəmiyyətini vurğulamış, ölkəsinin bu əməkdaşlığın daha da gücləndirilməsində maraqlı olduğunu söyləmişdir.

AzərTAc