Avqustun 7-də Azərbaycan Respublikasının maliyyə naziri Samir Şərifov Dünya Bankının Cənubi Qafqaz üzrə yeni təyin olunmuş regional direktoru Henri Keralinin başçılıq etdiyi nümayəndə heyəti ilə görüşmüşdür. 
Nazirliyin mətbuat xidmətindən bildirmişlər ki, tanışlıq xarakteri daşıyan görüşdə Azərbaycandakı sosial-iqtisadi inkişaf, ölkənin davamlı iqtisadi artımı və şaxələndirilməsi, Dünya Bankı tərəfindən ölkəmizdə maliyyələşdirilən, o cümlədən kənd təsərrüfatı, səhiyyə, infrastruktur və digər sahələri əhatə edən layihələrin hazırkı icra vəziyyəti və ölkə üzrə iqtisadi inkişaf strategiyasının müxtəlif istiqamətləri müzakirə olunmuşdur.
Görüşdə tərəflər arasında əməkdaşlığın yaxşı səviyyədə olduğu vurğulanmış, Azərbaycanda son illər əldə edilən uğurlar və gələcəkdə görüləcək işlər ətrafında geniş fikir mübadiləsi aparılmışdır.

AzərTAc