Naxçıvan Muxtar Respublikası Ali Məclisinin sədri Vasif Talıbov Dünya Bankının Azərbaycan Kənd İnvestisiya Layihəsi üzrə Tapşırıq Qrupunun yeni rəhbəri Daniel Ouen və layihənin xətti ilə keçirilən "Zonalararası qarşılıqlı görüşlər sessiyası" konfransında iştirak edən qonaqlarla görüşmüşdür.
Ali Məclisin sədri bu layihə çərçivəsində görülən işlərin muxtar respublika üçün faydalı olduğunu, 2005-2008-ci illər ərzində 104 layihə həyata keçirildiyini bildirmişdir. Qeyd olunmuşdur ki, əlavə maliyyələşmə layihəsi ilə əlaqədar olaraq 2009-cu ilin iyul ayından indiyədək 22 layihə icra olunmuşdur.
V.Talıbov Azərbaycan Kənd İnvestisiya Layihəsinin kollektivinə təşəkkür etmiş, layihələrin bundan sonra da uğurla icra olunmasına lazımi dəstək göstəriləcəyini bildirmişdir.
Daniel Ouen layihənin Naxçıvandakı fəaliyyətindən məmnunluğunu ifadə etmiş, Dünya Bankının İnvestisiya Layihəsi ilə Naxçıvan hökumətinin birgə əməkdaşlığını görülən işlər sırasında ən yaxşı nümunə kimi dəyərləndirmişdir.
Görüş zamanı həyata keçirilən layihələrin artıq bəhrə verdiyi, əhalinin onlardan faydalandığı, xüsusən su və yolların bərpası sahəsində olan layihələrin mühüm əhəmiyyət kəsb etdiyi vurğulanmışdır.{nl}