"Bakıya bu səfərim Azərbaycan ilə Meksika arasında dostluğun və əməkdaşlığın başlanğıcıdır".
Bu sözləri Azərbaycanda səfərdə olan Meksika Konqresinin Deputatlar Palatasının sədri Oskar Arse iyulun 18-də jurnalistlərə müsahibəsində söyləmişdir.
O.Arse demişdir: "Bu mənim Azərbaycana ilk səfərimdir. Düşünürəm ki, bundan sonra biz Azərbaycana tez-tez gələcəyik. Bu bizim dostluğumuzun və əməkdaşlığımızın başlanğıcıdır. Azərbaycan ilə Meksikanın oxşar cəhətləri vardır. İnanıram ki, bundan sonra biz bir çox sahələrdə, o cümlədən iqtisadiyyat, ticarət, mədəniyyət, səhiyyə sahəsində çox sıx əməkdaşlıq edəcəyik".
O.Arse diqqətə çatdırmışdır ki, Meksika nümayəndə heyətinin tərkibində deputat Marcos Perez də vardır. Meksika Konqresinin Deputatlar Palatasında Ermənistan-Azərbaycan, Dağlıq Qarabağ münaqişəsinin nizamlanması, eləcə də Xocalı soyqırımının tanınması ilə bağlı qərarların qəbul olunmasında onun çox böyük əməyi olmuşdur. Prezident İlham Əliyev deputat Marcos Perezə "Azərbaycan Respublikasının Fəxri diplomu"nu təqdim etmişdir. Bu diqqətə görə biz Prezident İlham Əliyevə və Azərbaycan xalqına minnətdarıq.
Deputatlar Palatasının sədri yaxın zamanlarda Meksikanın Bakıda səfirliyinin açılması üçün çalışacağını bildirmişdir. O demişdir ki, bu səfirlik bizə bir çox sahələrdə əməkdaşlığı genişləndirməyə imkan verəcəkdir. Səfirliyin açılması ilə bağlı saziş imzalanacaqdır.
Qonaq həmçinin demişdir: "Çox şadam ki, Fəxri xiyabana gəldim, Heydər Əliyevin və Zərifə xanım Əliyevanın məzarını ziyarət etdim. Düşünürəm ki, əgər bir xalq öz ölkəsinin böyük şəxsiyyətlərinə belə hörmət bəsləyirsə, onun gələcəyi çox parlaqdır".