Ölkə əhalisinin sayı ilin əvvəlindən 59,3 min nəfər artaraq 2012-ci il iyul ayının 1-i vəziyyətinə 9 milyon 294 min nəfərə çatmışdır. Əhalinin sıxlığı bir kvadratkilometrə 107 nəfər olmuşdur. Əhalinin 49,6 faizini kişilər, 50,4 faizini qadınlar təşkil edir. Onların 22 faizi 0-14 yaşda, 72 faizi 15-64 yaşda, 6 faizi 65 və yuxarı yaşda olanlardır.  
Dövlət Statistika Komitəsinin məlumatına görə, 2012-ci ilin birinci yarısında 86,4 min, gündə təxminən 475 körpə doğulmuş, ötən ilin müvafiq dövrü ilə müqayisədə əhalinin hər 1000 nəfəri hesabı ilə doğumun səviyyəsi 18,9 faizdən 19 faizədək artmışdır. Körpələrin 896-sı əkiz, 24-ü isə üçəm doğulmuşdur. Cari ildə doğulan körpələr üçün 73,8 yaş, o cümlədən oğlanlar üçün 71,2 yaş, qızlar üçün 76,5 yaş ömür uzunluğu gözlənilir. Yanvar-iyun aylarında ölkədə 40,4 min nikah və 5,4 min boşanma halı qeydə alınmış və 2011-ci ilin müvafiq dövrünə nisbətən əhalinin hər 1000 nəfəri hesabı ilə nikah və boşanmaların sayı eyni səviyyədə (8,9 və 1,2) qalmışdır. 2012-ci ilin altı ayı ərzində daimi yaşamaq üçün Azərbaycana 1,1 min nəfər gəlmiş və 0,1 min nəfər ölkədən getmişdir.

T.ƏLİYEV, "Xalq qəzeti"