Belarus Respublikasının maliyyə naziri Andrey Xarkovesin dəvəti ilə bu ölkədə səfərdə olan Azərbaycan Respublikasının maliyyə naziri Samir Şərifov Minskdə bir sıra görüşlər keçirmişdir. 
Nazirliyin mətbuat xidmətindən AzərTAc-a bildirmişlər ki, Belarusun Baş naziri Mixail Myasnikoviç ilə keçirilən görüşdə S.Şərifov ölkəmizin sürətli iqtisadi inkişafı barədə ətraflı məlumat vermiş, Azərbaycan ilə Belarus arasında bütün sahələrdə dialoqun daha da intensivləşdirilməsinin vacibliyini bildirmişdir.
Prezidentlər İlham Əliyev və Aleksandr Lukaşenkonun siyasi iradələrinə uyğun olaraq iki ölkə arasındakı münasibətlərin uğurla və dinamik şəkildə inkişaf etdiyini deyən nazir Azərbaycanın Belarusla bütün sahələrdə əməkdaşlığı daha da genişləndirməsinin dövlətlərimizin strateji maraqlarına cavab verdiyini diqqətə çatdırmışdır.
Ölkələrimiz arasında həyata keçirilən birgə layihələr barədə danışan Baş nazir M.Myasnikoviç iqtisadi sahədə əməkdaşlığın daha da inkişaf etdirilməsi və qarşılıqlı investisiyalar baxımından yaxşı perspektivlərin olduğunu vurğulayaraq demişdir: "Yüksək səviyyədə dövlətlərarası dialoq hesabına ticari-iqtisadi əməkdaşlıq sahəsində bir sıra konkret layihələr reallaşdırılmışdır".
Səfər çərçivəsində maliyyə naziri S.Şərifov Belarus Respublikasının Baş nazirinin müavini Mixail Rusiy, maliyyə naziri Andrey Xarkoves, Milli Bankın sədri Nadejda Yermakova və Əmək və Sosial Müdafiə naziri Marianna Şatkina ilə də ayrı-ayrılıqda görüşlər keçirmişdir. Görüşlərdə iki ölkə arasında əlaqələrin uğurla inkişaf etdiyi bir daha vurğulanmış, iqtisadi, o cümlədən maliyyə, investisiya, bank, sığorta, yeni istehsal sahələrinin açılmasına dair Azərbaycan-Belarus əməkdaşlığının genişləndirilməsi ilə bağlı ətraflı fikir mübadiləsi aparılmışdır.
Görüşlərdə Azərbaycanın Belarusdakı səfiri İsfəndiyar Vahabzadə də iştirak etmişdir.