Trans-Anadolu kəməri "Cənub" dəhlizinin vacib hissəsi olacaqdır. 
Bu bəyanatla ABŞ Dövlət Departamentinin rəsmisi iyulun 2-də çıxış edərək ABŞ hökumətinin Türkiyə ilə Azərbaycan arasında kəmər layihəsinə dair imzaladığı hökumətlərarası razılaşmaya dəstəyini bildirmişdir. Diplomat vurğulamışdır ki, Birləşmiş Ştatlar Azərbaycanın Avropaya təbii qaz ixrac edən və Avratlantik icma ilə əlaqələrini möhkəmləndirən "Cənub" dəhlizinin yaradılması məqsədini dəstəkləyir. O demişdir: "Biz, ölkələrimiz arasında ümumi strateji maraq kəsb edən enerji təhlükəsizliyi üzrə Azərbaycanla birgə işləyirik. Əməkdaşlığımız Azərbaycanın suverenliyi və müstəqilliyini möhkəmləndirməklə yanaşı, Avropanı müxtəlif enerji mənbələri seçimi ilə də təmin edir". Dövlət Departamentinin rəsmisi Azərbaycanın "Şahdəniz" yatağından çıxarılan təbii qazın "Cənub" dəhlizinin əsasını qoyacağını, Trans-Anadolu kəmərinin bu dəhlizin vacib hissəsi olaraq Türkiyədən keçəcək "Şahdəniz" qazı və gələcəkdə Xəzər hövzəsinin digər enerji istehsalçıları üçün mükəmməl, genişləndirilə biləcək marşruta çevriləcəyini bəyan etmişdir.

Şəfəq AKİFQIZI, AzərTAc-ın xüsusi müxbiri
Vaşinqton