İstanbulda Türkiyədəki Azərbaycanlı İş Adamları Birliyinin (TAİB) təqdimat mərasimi keçirilmişdir. Tədbirdə Azərbaycan Respublikasının iqtisadi inkişaf naziri Şahin Mustafayev, Türkiyənin İqtisadiyyat Nazirliyi müsteşarı Ahmet Yakıcı çoxsaylı azərbaycanlı və türk iş adamları iştirak etmişlər. Mərasimdə Azərbaycan Türkiyə İş Adamları Birliyinin İdarə Heyətinin sədri Cemal Yangın da iştirak etmişdir.

Tədbirdə ATİB və TAİB arasında əməkdaşlıq memorandumu imzalanmışdır. Memoranduma əsasən tərəflər ölkələr arasında iqtisadi, sosial və mədəni əlaqələrin gücləndirilməsini millətlərin, təşkilatların və xalqların inkişafı üçün önəmli hesab edirlər. Hər iki təşkilatın məqsədi üzvlərinin inkişafı və hədəflərinə çatmaları üçün dəstək verməkdir.

Əməkdaşlıq memorandumuna görə, tərəflər Azərbaycan və Türkiyə şirkətləri arasında iqtisadi, biznes, əməkdaşlıq əlaqələrinin genişləndirilməsini və zərurət yarandıqda bu şirkətlərə Azərbaycan və Türkiyənin biznes mühiti ilə bağlı məlumatın verilməsini həyata keçirəcəklər.

Tərəflər təşkilatçı ölkənin hökumət üzvlərinin iştirakı nəzərə alınmaqla, Azərbaycan və Türkiyənin müxtəlif şəhər və regionlarında, cəlb olunacaq investisiyalar, biznes əlaqələrin inkişafı, əməkdaşlıq yollarının müəyyən edilməsi və təcrübə mübadiləsi imkanlarının yaradılması üçün tədbirin (konfrans, simpozium və s.) təşkilini həyata keçirməyə çalışacaqlar.

Memorandumu ATİB tərəfindən İdarə Heyətinin sədri Cemal Yangın, TAİB tərəfindən isə təşkilatın sədri Seymur Ağayev imzalamışdır.

Azərbaycan Türkiyə İş Adamları Birliyinin ictimaiyyətlə əlaqələr sektorundan bildirmişlər ki, hazırda 84 şirkət ATİB-in üzvdür və bu şirkətlər Azərbaycan iqtisadiyyatına 3 milyard manatdan çox investisiya yatırmışlar. ATİB üzvü şirkətlərdə 40 minə yaxın işçi çalışır.

Z. BƏŞİRQIZI, "Xalq qəzeti"