"Nabucco International" şirkətinin baş direktoru Reynhard Mitçek "Nabucco West" layihəsini TANAP-a bağlamaq istədiklərini bildirmişdir.
"Şahdəniz-2" konsorsiumunun Türkiyə-Bolqarıstan sərhədlərindən başlayacaq bu layihəni seçməsinin ardından "Nabucco International" ortaqları iyunun 26-da Azərbaycan Prezidenti İlham Əliyev və Türkiyənin Baş naziri Rəcəb Tayyib Ərdoğanın imzaladıqları Trans-Anadolu qaz kəməri layihəsinin reallığa çevrildiyini görmüş və TANAP-a qoşulmaq üçün təcili Bakı və Ankara ilə danışıqlar aparmaq istədiklərini bəyan etmişlər.
Müzakirələrə iyul ayında başlayacaqlarını bildirən R.Mitçek əlavə etmişdir ki, 1300 kilometrlik "Nabucco West" xətti Bolqarıstandan başlayacaq və Rumıniya, Macarıstan üzərindən Azərbaycan təbii qazını Avstriyaya çatdıracaqdır. Onun sözlərinə görə, TANAP-ın uğurla həyata keçiriləcəyinə heç kimin şübhəsi yoxdur.
İstanbul-Avstriya telekonfransında Anadolu agentliyinin sualına cavab verən R. Mitçek demişdir ki, Avropa Komissiyasının da dəstəklədiyi "Nabucco West" xətti TANAP-a qoşulduqdan sonra tədarük problemi həllini tapacaqdır. İlk mərhələdə boru xətlərinin bir-birinə bağlanması üçün detalları "Şahdəniz-2" konsorsiumu ilə birlikdə müzakirə etmək planlaşdırılır. Azərbaycanın 2020-2025-ci illərdə təbii qaz hasilatını 50 milyard kubmetrə çatdıracağını nəzərə alsaq, bu ehtiyatların "Nabucco West" üçün də mükəmməl mənbə olacağını düşünmək olar.

Oqtay BAYRAMOV AzərTAc-ın xüsusi müxbiri
Ankara