İngiltərənin aparıcı maliyyə nəşrlərindən hesab olunan "World Finance Review" jurnalı son nömrəsində Azərbaycan Metanol Şirkəti (AzMeCo) haqda material dərc etmişdir. 
"Gələcək üçün təmiz enerji" adlı məqalədə son illər Azərbaycanda gedən iqtisadi proseslərdən söz açılır, ölkəmizin makroiqtisadi islahatlar nəticəsində sabit inkişaf proqramı ilə irəlilədiyi bildirilir. Eyni zamanda, AzMeCo şirkətinin Azərbaycanda irimiqyaslı layihələri maliyyələşdirib həyata keçirdiyi diqqətə çatdırılır.
2007-ci ildə əsası qoyulan AzMeCo şirkətinin Xəzər Dənizi hövzəsində beynəlxalq karbohidrogen investisiyaları ilə regionda ilk metanol zavodunun tikintisinə investisiya yönəltdiyi vurğulanır. Bakının Qaradağ rayonunda tikilən zavodun ildə 561 min ton metanol istehsal etmək gücünə malik olacağı və gələcəkdə istehsal prosesində atmosferə atılan karbon dioksidinin (CO2) toplanması və utilizasiyası yolu ilə istehsal gücünün ildə 720 min tona çatdırılmasının planlaşdırıldığı qeyd olunur.
Jurnal layihəni nadir və yenilikçi adlandırır. Bildirilir ki, zavodun üçqat təhlükəsizlik sistemi mövcuddur və 9 bal gücünə qədər zəlzələyə davam gətirə bilər. Bu fakt digər yerli sənaye müəssisələri üçün də yaxşı nümunədir. Məqalədə, həmçinin layihənin reallaşmasının Azərbaycanın iqtisadi inkişafına öz töhfəsini verəcəyi vurğulanır. Xüsusilə, Qaradağda neft-kimya klasterinin inkişafını stimullaşdıracağı, bunun da ölkədə daha çox investisiya qoyuluşlarına və yeni iş yerlərinin yaranmasına şərait yaradacağı bildirilir.
Məqalənin içərisində AzMeCo Şirkətlər Qrupunun icraçı direktoru Nəsib Piriyevin müsahibəsi də yer almışdır. O zavodun ilk növbədə ölkəmizin iqtisadiyyatına və qeyri-neft sektorunun inkişafına müsbət təsir göstərəcəyini, metanolun gələcəkdə alternativ enerji mənbəyi və benzin komponenti kimi Azərbaycanda da geniş şəkildə istifadə olunacağına ümid etdiyini demişdir.