Xəzərdə Azərbaycan və Türkmənistan sərhədində yerləşən "Kəpəz" yatağı mübahisəli sayılır.
APA-nın məlumatına görə, bu barədə ARDNŞ-in iqtisadi məsələlər üzrə vitse-prezidenti Süleyman Qasımov bildirmişdir.
Onun sözlərinə görə, Xəzərin sektorlara bölünməsi ilə bağlı Azərbaycan-Rusiya, Azərbaycan-Qazaxıstan və Rusiya-Qazaxıstan arasında müqavilələr bağlansa da, indiyədək Azərbaycan-İran və Azərbaycan-Türkmənistan arasında razılaşma əldə olunmamışdır: "Buna görə də orta xəttə düşən "Kəpəz" yatağı mübahisəli sayılır və indiyədək istismar olunmur".
S.Qasımov qeyd etmişdir ki, Azərbaycan tərəfi indiyədək bu yatağın birgə işlənməsi ilə bağlı təkliflər irəli sürsə də, bölgü tam başa çatmayanadək bu məsələ açıq qalmışdır.
ARDNŞ nümayəndəsi bildirmişdir ki, Türkmənistanın həmin yataqda Türkmənistan prezidentinin İran səfəri zamanı işə başlamağa cəhd etməsi təəssüf doğurur: "Təəssüf ki, Türkmənistan prezidentinin İrana səfəri ilə eyni zamanda burada geofiziki işlərin aparılmasına cəhd olunmuşdur".
S. Qasımov Azərbaycan XİN-in mövqeyini təkrarlayaraq bu işlərin Azərbaycan sərhədlərinin pozulması, ölkə ərazisində işlərin aparılması kimi qiymətləndirdiyini bildirmişdir.