Azərbaycan Respublikası Prezidentinin "Keçmiş SSRİ Əmanət Bankının Azərbaycan Respublikası Bankının Azərbaycan Respublikasının vətəndaşları olan əmanətçilərinə fərdi birdəfəlik ödəmələrin verilməsi haqqında" 2012-ci il 14 mart tarixli fərmanına uyğun olaraq, iyun ayının 1-dən "Kapital Bank"ın xidmət məntəqələrində əmanətçilərdən müraciətlərin qəbulu davam etdirilir. 
İyunun 20-dək fərdi birdəfəlik ödəmələrlə bağlı "Kapital Bank" ASC-yə ümumilikdə 180 min müraciət daxil olmuşdur. Bunun da 177 min 462-si əmanətlərin verilməsi, 3.140-ı isə itmiş, yaxud təqdim edilmək üçün yararsız vəziyyətə düşmüş əmanət kitabçaları ilə bağlı olmuşdur.
Bu sözləri iyunun 21-də Bakıda bankın idarə heyəti sədrinin müavini Araz Əliyev fərdi birdəfəlik ödəmələrlə bağlı keçirdiyi mətbuat konfransında bildirmişdir.
A.Əliyev vurğulamışdır ki, əmanətlərin verilməsi ilə bağlı 177 min 462 müraciətdən 105 min 507-si məntəqələrdən Bankın Əmanətçilərə Birdəfəlik Ödəmələrin Verilməsi Mərkəzinə ötürülmüşdür. Ötən dövrdə 63 min 167 əmanətçiyə ümumilikdə 37 milyon manat məbləğində fərdi birdəfəlik ödəmə verilmişdir. 27 min müraciətə isə baxılmış, hazırda onların ödənişi üçün qəbzlər məntəqələrə verilmişdir. Bank tərəfindən gündə 14-15 min ərizə qəbul olunur.