İyunun 9-da Sənaye və Energetika Nazirliyində Finlandiyanın "WARTSİLA" şirkətinin vitse-prezidenti Kristof Vitzsumun rəhbərlik etdiyi nümayəndə heyəti ilə geniş tərkibli görüş keçirilmişdir.
Qonaqlar əvvəlcə Fəxri Xiyabana gələrək, xalqımızın ümummilli lideri, görkəmli dövlət xadimi Heydər Əliyevin xatirəsini ehtiramla yad etmiş, məzarı önünə gül dəstələri qoymuşlar.
Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üstünə tər çiçəklər düzülmüşdür.
Görüşdə sənaye və energetika nazirinin müavini Natiq Abbasov Azərbaycan iqtisadiyyatının sürətli inkişafı, ölkəmizdə xarici sərmayələrin cəlb edilməsi üçün mövcud əlverişli investisiya mühiti barədə ətraflı məlumat vermişdir. Bildirmişdir ki, dünyanın ən məşhur korporasiyalarından olan "WARTSİLA" şirkəti məhz bu vacib amili əsas götürərək, Azərbaycanda özünün ən yeni texnologiyalarının təqdimatını keçirmək barədə nazirliyə müraciət etmişdir.
Daha sonra şirkətin əsas fəaliyyət istiqamətləri haqqında məlumat verilmişdir. "WARTSİLA" şirkətinin dünyanın 70 ölkəsində 160 törəmə müəssisəsinin mövcudluğunu diqqətə çatdıran N.Abbasov onun modul elektrik stansiyalarının tikilib istismara verilməsi, neft və qaz kompressor avadanlığı, istilik sistemləri kimi sahələrdə böyük təcrübəyə malik olduğunu söyləmişdir. Eyni zamanda, şirkət hərəkətverici ləvazimat, avtomatika və enerjipaylama sistemləri də daxil olmaqla, gəmiçilik sahəsi üçün avadanlıq, xüsusilə gəmi mühərrikləri istehsalında dünya liderlərindəndir. Təsadüfi deyildir ki, bu gün dünyadakı hər üç gəmidən birinin mühərriki şirkətin müəssisələrində istehsal olunur.
Azərbaycan "WARTSİLA" şirkətinin Xəzər regionundakı əsas tərəfdaşlarından biridir. Artıq 10 ildir ki, Azərbaycanda çalışan bu şirkət respublikamızda əsasən neft və qaz sənayesi, elektrik enerjisi hasilatı, dəniz daşımaları sahəsində fəaliyyətlə məşğuldur. "WARTSİLA" 2005-ci ildən 2010-cu ilədək ölkəmizin ərazisində ümumi gücü 880 meqavat olan modul elektrik stansiyalarının tikilməsi və istismara verilməsi layihələrini uğurla başa çatdırmışdır. Şirkətin avadanlığı Bakı-Tbilisi-Ceyhan əsas ixrac neft boru kəməri kimi dünya əhəmiyyətli layihənin həyata keçirilməsində fəal rol oynamışdır.
Tədbirdə "WARTSİLA" şirkətinin vitse-prezidenti Kristof Vitzsum iqtisadiyyatı gündən-günə inkişaf edən, dünyanın lider dövlətləri sırasında öz mövqeyini getdikcə gücləndirən Azərbaycanda müxtəlif layihələr həyata keçirmələrindən məmnun olduqlarını diqqətə çatdırmışdır. Bildirmişdir ki, şirkətin Bakıda yeni, genişlənmiş ofis və əməliyyat sexi 2008-ci ilin iyununda istifadəyə verilmişdir. Ofis həm elektrik stansiyaları, həm də gəmiçilik sahəsi üzrə satış və servisi təmin edir. Bu servis mərkəzləri, həmçinin şirkətin Orta Asiyada fəaliyyətini tənzimləyir.
Sonra nümayəndə heyətinin üzvləri "WARTSİLA" şirkətinin fəaliyyət istiqamətləri üzrə ən müasir texnologiyalara əsaslanan işlərin geniş təqdimatını keçirmiş, iştirakçıların suallarını cavablandırmışlar.
Tədbirdə Fövqəladə Hallar, Müdafiə, Müdafiə Sənayesi, Səhiyyə nazirlikləri, Dövlət Sərhəd Xidməti, Azərbaycan Respublikası Dövlət Neft Şirkəti, "Azərenerji" və "Azəristiliktəchizat" ASC-lər, Dövlət Xəzər Dəniz Gəmiçiliyi, Bakı Metropoliteni və digər dövlət qurumlarının aidiyyəti baş mütəxəssisləri iştirak etmişlər.