Bu barədə çərşənbə axşamı Trend-ə Macarıstan İqtisadiyyat Nazirliyinin dövlət katibi Roza Nad açıqlama vermişdir.
"Sahibkarlara - həm burada bizimkilərə, həm də Macarıstanda azərbaycanlılara köməyə ehtiyac var. Bu istiqamətdə effektiv addım Bakıda Ticarət Evinin açılması olacaq", - deyən Roza Nadın sözlərinə görə, belə institut macar sahibkarlara, xüsusilə, xırda sahibkarlara dəstək göstərməyə, onların məhsullarını Azərbaycana tədarük etməyə imkan verəcək.
Dövlət katibi demişdir:"Ötən ilin payızında bizim prezident Azərbaycana səfər edib və Bakıda Macarıstan Ticarət Evinin açılmasına dair planları səsləndirib. Biz bu istiqamətdə çox işləmişik və hesab edirəm ki, bu, payızda həyata keçiriləcək. Macarıstan dünya ölkələrində 8-10 Ticarət Evi açmağı planlaşdırır, onlardan birincisi Azərbaycanda işinə başlayacaq". O, əlavə etmişdir ki, Macarıstan xarici ticarətin inkişafına dair yeni proqram reallaşdıracaq. Bu proqram ilk növbədə Şərq istiqamətində, eləcə də Azərbaycanla ticarət əlaqələrinin genişləndirilməsini nəzərdə tutur:"Bu gün ölkələr arsında ticarət dövriyyəsinin səviyyəsi çox aşağıdır. Ötən il mal dövriyyəsi 74,6 milyon dollar təşkil edib, onun böyük hissəsi Macarıstandan Azərbaycana ixracın payına düşüb. Macarıstan və daha sonra Avropa bazarlarına çıxarılması mümkün olan Azərbaycan məhsullarını aşkara çıxarmaq üçün birlikdə çalışmaq lazımdır".