Kənd Təsərrüfatı Nazirliyinin Aqrar Elm Mərkəzi, Elmi-Tədqiqat Əkinçilik İnstitutu və Respublika Dövlət Toxumçuluq Müfəttişliyinin birgə təşkilatçılığı ilə Azərbaycan Elmi-Tədqiqat Əkinçilik İnstitutunda dənli bitkilərin toxumçuluğu və aprobasiyasına həsr edilmiş ümumrespublika seminar-müşavirəsi keçirilmişdir. Seminar iştirakçıları əvvəlcə institutun elmi nailiyyətlərini əks etdirən foto-sərgi və alimlərin elmi-tədqiqat işləri ilə tanış olmuşlar. Həmçinin, institutun müasir avadanlıqlarla təchiz olunmuş laboratoriyalarına baxış keçirilmişdir.
Respublikanın kənd təsərrüfatı naziri İsmət Abasov seminar iştirakçılarını salamlayaraq, ümummilli lider Heydər Əliyev tərəfindən əsası qoyulan iqtisadi inkişafın Prezident İlham Əliyev tərəfindən uğurla davam etdirilməsi sayəsində aqrar sahədə əldə edilən nailiyyətlər, hökumətin aqrar sahəyə göstərdiyi diqqət və qayğı, dənli bitkilərin toxumçuluğuna ayrılan dövlət vəsaiti haqqında ətraflı məlumat vermişdir.
Nazirliyin mətbuat xidmətinin verdiyi məlumata görə, əkin sahəsində seleksiya işlərinə, eləcə də institut alimləri tərəfindən yaradılan yeni buğda və arpa sortlarına baxış zamanı İsmət Abasov demişdir: "Toxumun keyfiyyəti, onun məhsuldarlığı kənd təsərrüfatının əsas inkişaf mənbəyidir. Növbəti həftələrdə bu cür müşavirələr institutun bölgə təcrübə stansiyalarında keçiriləcək və həmin tədbirlərdə fermerlər də iştirak edəcəklər. İnstitutun əkin təcrübə sahələrində məhsuldarlıq 60-70 sentnerdir. Halbuki, respublika üzrə taxıl sahələrinin hər hektarında orta göstərici 25 sentnerə bərabərdir. Bu, bizi qane etmir. Əgər alimlərimizin köməyi və fermerlərimizin səyi ilə orta məhsuldarlığı 35 sentnerə çatdıra bilsək, ölkəmizdə ərzaq təhlükəsizliyini tam təmin etmiş olarıq. Yüksək məhsuldarlığa malik dənli bitkilərin istehsalı üçün aqrotexniki tədbirlərin (yerin şumlanması, növbəli əkinlər, bitki mühafizəsi və s.) vaxtında, keyfiyyətlə görülməsi vacib məsələdir. Fermerlərimiz həmin tədbirlərə lazımi səviyyədə əməl etsələr yüksək məhsuldarlıq əldə etmək mümkündür".
Nazir taxıl genefondu sahələri ilə tanış olmuş, hər bir sortun potensial məhsuldarlığı və keyfiyyət göstəriciləri ilə maraqlanmışdır. Zəmilərdə taxılın məhsuldarlığını artırmaq üçün fermerlərə, sahibkarlara məsləhət və tövsiyələrini vermişdir.
Seminar-müşavirənin iştirakçıları ölkə rəhbəri İlham Əliyevin aqrar sahəyə göstərdiyi diqqət və qayğıya görə minnətdarlıqlarını bildirmiş, bol məhsulun əldə olunması üçün fermerlərə və sahibkarlara hər cür şəraitin yaradıldığını qeyd etmişlər. Qabaqcıl fermerlər yüksək məhsuldarlığın əldə olunması ilə bağlı öz təcrübələrindən söhbət açmışlar.
Seminarda "Əkinçilik İnstitutunun seleksiya nailiyyətləri, Dövlət Reyestrində olan rayonlaşmış dənli bitki sortları və onların toxumçuluğu", "Toxumların sortluq və səpin keyfiyyətlərinin sertifikatlaşdırılmasında Dövlət Toxum Müfəttişliyinin qarşısında duran vəzifələr", "Seleksiya nailiyyətlərinin Dövlət Reyestrinə daxil olan dənli bitki sortları və onlardan istifadə qaydaları haqqında", "Aprobatorların dənli bitkilərin toxumluq sahələrinin aprobasiyasına dair standartlarla təlimatlandırılması" mövzuları ətrafında aparılan müzakirələr maraqlı və faydalı olmuşdur.

Telman ƏLİYEV, "Xalq qəzeti"