Azərbaycan Respublikası Dövlət Neft Şirkətinin (ARDNŞ) baş ofisində qurumun prezidenti Rövnəq Abdullayev İtaliyada elektrik enerjisi və təbii qazın istehsalı, təchizatı və satışı ilə məşğul olan "Edison Spa" şirkətinin icraçı vitse-prezidenti Roberto Potinin başçılıq etdiyi nümayəndə heyəti ilə görüşmüşdür.
ARDNŞ-dən verilən məlumata görə, Rövnəq Abdullayev "Edison Spa" şirkətinin Avropanın enerji təhlükəsizliyinin təminatı baxımından mühüm əhəmiyyət kəsb edən layihələrin hazırlanmasında fəal iştirak etdiyini söyləmişdir. Bildirmişdir ki, Azərbaycan Xəzər dənizi akvatoriyasında hasil olunan təbii qazın Avropa İttifaqı ölkələrinə nəql edilməsi üçün nəzərdə tutulan "Cənub dəhlizi" ideyasını dəstəkləyir və bu çərçivədə həyata keçirilməsi planlaşdırılan ixrac boru kəmərləri layihələrini diqqətlə nəzərdən keçirir.
"Edison Spa" şirkətinin icraçı vitse-prezidenti Roberto Poti Bakıya XVII Beynəlxalq Xəzər neft, qaz, neftayırma və neft kimyası sərgi-konfransında iştirak etmək üçün gəldiklərini və fürsətdən istifadə edərək Azərbaycanın neft-qaz sənayesinin aparıcı şirkəti olan ARDNŞ-in rəhbərliyi ilə görüşmək istədiklərini söyləmişdir. O, Azərbaycanda həyata keçirilən irimiqyaslı qaz hasilatı layihələrinin beynəlxalq neft-qaz şirkətləri tərəfindən maraqla izlənildiyini söyləmişdir.
Neft-qaz sərgi-konfransının 17-ci dəfə keçirilməsinə baxmayaraq, aktuallığını itirmədiyini bildirən ARDNŞ prezidenti builki forumda əsas diqqətin Avropanın enerji təminatı məsələsinə yönəldiyini vurğulamış, bu istiqamətdə maraqlı fikirlər səsləndiyini nəzərə çarpdırmışdır.
"Edison Spa" şirkətinin Türkiyə-Yunanıstan-İtaliya layihəsinin iştirakçılarından olduğunu xatırladan Roberto Poti "Şahdəniz" yatağından hasil olunan təbii qazın Cənubi Avropa regionunda, o cümlədən İtaliyada satışı məsələsində maraqlı olduqlarını ifadə etmişdir.
Görüşdə "Şahdəniz" yatağından hasil olunan təbii qazın Cənubi Avropa ölkələrinə tədarük olunması layihəsinin cəlbediciliyi qeyd edilmişdir.{nl}

AzərTAc