Mərkəzi Bankda kommersiya banklarının nağd pul sahəsində çalışan rəhbər işçiləri, eləcə də hüquq-mühafizə orqanlarının nümayəndələrinin iştirakı ilə "Pul nişanlarının saxtalaşdırılmasına qarşı mübarizənin təşkili" mövzusunda geniş seminar keçirilmişdir.
Seminarda saxta pul çapına qarşı mübarizə, pul nişanlarının mühafizə fəlsəfəsi, nağd pulla əməliyyatlarda risklərin tənzimlənməsi, iqtisadiyyatın nağd pula olan tələbatının ödənilməsində Mərkəzi Bankın rolu, həyata keçirdiyi siyasət və digər mövzularda təqdimat və məruzələr edilmişdir.
Mərkəzi Bankın baş direktoru Aqşin Vəliyev bildirmişdir ki, ölkə iqtisadiyyatının, eləcə də bank və ödəniş sistemlərinin dinamik inkişafı şəraitində Azərbaycan manatına olan inam və milli pul nişanlarının tədavül vasitəsi kimi cəlbediciliyi onun regional miqyasda güclü valyutaya çevrilməsinə zəmin yaratmışdır. Lakin müasir dövrdə kompyuter və surətçıxarma texnologiyalarının intensiv inkişaf etməsi, əsginasların mühafizəsi üçün istifadə olunan texnologiyaların digər sahələrdə də istifadəsi Azərbaycan manatının saxtalaşdırılması üzrə potensial riskləri artırır. Bu isə öz növbəsində pul nişanlarının saxtalaşdırılmasına qarşı müvafiq tədbirlərin gücləndirilməsini tələb edir.
Tədbirdə "Pul nişanlarının ekspertizasının təşkili", "Kommersiya bankları ilə nağd pulla əməliyyatlarda potensial risklər və onların aradan qaldırılması" və "Pul nişanlarının evalyusiyası; Nağd pul dövriyyəsində Mərkəzi Bankın rolu və həyata keçirdiyi siyasət" mövzularında təqdimatlar olmuşdur.
Sonda kommersiya banklarında əhaliyə xidmət səviyyəsinin yüksəldilməsi, milli valyutanın saxtalaşdırılması risklərinin azaldılması, bank əməkdaşlarının maarifləndirilməsi zəruriliyini və bu sahədə Mərkəzi Bank tərəfindən davamlı tədbirlərin həyata keçiriləcəyi qeyd edilmişdir.

AzərTAc