2012-ci il mayın 10-da "Azpetrol" şirkəti Bakı şəhəri Heydər Əliyev prospekti, 105 və 108 ünvanlarında yeni yanacaqdoldurma məntəqələrini açdı. Xatırladaq ki, bu, "Azpetrol"un sayca 78-ci və 79-cu yanacaqdoldurma məntəqələridir.
Yeni məntəqələrin açılışında Nizami Rayon İcra Hakimiyyətinin rəhbərliyi, Türkiyənin "Sistem Reklamçılıq Aydınlatma və İnşaat Sənaye" şirkətinin nümayəndələri və digər qonaqlar iştirak edirdilər.
Məntəqələrin açılışı zamanı "Azpetrol" Şirkətinin baş direktoru Hüseynağa Rəhimov çıxış edərək bildirdi ki, bugünkü tədbir hamımız üçün çox əziz və əlamətdar bir günə - ümummilli liderimiz Heydər Əliyevin doğum gününə təsadüf etdiyindən və həmin məntəqələr ulu öndərin adını daşıyan prospektdə inşa edildiyindən xüsusilə əlamətdardır. Hüseynağa Rəhimov onu da vurğuladı ki, indiyədək respublikada mövcud olan yanacaqdoldurma məntəqələri arasında orijinal tərtibat və nəfis dizayn baxımından bənzəri olmayan bu məntəqələrin açılışı həm də şirkətin yaxın günlərdə Avropanın əksər dövlətlərinin nümayəndələrinin iştirakı ilə keçiriləcək böyük bayrama - "Eurovision" beynəlxalq musiqi yarışmasına xüsusi töhfəsidir.
Çox fərəhləndirici haldır ki, respublika iqtisadiyyatına qoyulan böyük həcmli investisiyaların əksər hissəsi daxili sərmayələrdən ibarətdir. Elə təkcə bu fakt Azərbaycanı çox güclü və dayanıqlı, özəl sektorun da inkişafı üçün münbit şəraitin bərqərar olduğu bir iqtisadiyyata malik dövlət kimi səciyyələndirir. Özəl sektorun Azərbaycanda gedən uğurlu proseslərdən bəhrələnərək gündən-günə güclənməsi isə möhtərəm Prezidentimiz İlham Əliyevin birbaşa rəhbərliyi və nəzarəti altında həyata keçirilən uğurlu və ardıcıl iqtisadi siyasətin məntiqi nəticəsidir.
Şirkətin rəhbəri daha sonra qeyd etdi ki, yeni məntəqələrin istifadəyə verilməsi ilə yeni iş yerlərinin açılması məsələsi həll olunur ki, bu da "Azpetrol"un fəaliyyətində əsas istiqamətlərindən biridir. Bu baxımdan yeni açılan məntəqələrin istifadəyə verilməsi ilə 132 daimi iş yeri açılacaqdır. Şirkət hazırda digər bölgələrdə də yanacaqdoldurma məntəqələri şəbəkəsinin genişlənməsi üzrə işlər aparır və yeni yanacaqdoldurma məntəqələrinin açılması istiqamətində tikinti işlərini davam etdirir. Belə ki, bu il "Azpetrol" Şirkəti Şəmkir və Sumqayıt şəhərlərində də gözəl tərtibatlı yanacaqdoldurma məntəqələrinin istismara verilməsini nəzərdə tutur.
Yeni yanacaqdoldurma məntəqələrinin təntənəli açılış günü şirkətin rəhbərliyi, əməkdaşları və qonaqlar ulu öndər Heydər Əliyevin məzarını ziyarət edərək, onun və akademik Zərifə xanım Əliyevanın məzarları önünə əklillər və gül dəstələri düzdülər.
"Azpetrol" şirkətinin mətbuat xidməti