Mayın 3-də Azərbaycan Universitetində "Daxili audit: reallıqlar və perspektivlər" mövzusunda beynəlxalq konfrans işinə başlamışdır. 
Konfransı Azərbaycan Auditorlar Palatasının sədri Vahid Novruzov açaraq müzakirə olunan məsələ ilə bağlı geniş məlumat vermişdir. O bildirmişdir ki, konfransın məqsədi daxili auditin iqtisadi inkişafda rolu və əhəmiyyəti sahəsində peşəkar müzakirələr aparmaq, mövcud problemləri təhlil etmək, beynəlxalq təcrübə nəzərə alınmaqla daxili auditin genişləndirilməsi istiqamətlərini dəqiqləşdirmək, maarifləndirmə və əməkdaşlıq üzrə fəaliyyət mexanizmlərini müəyyən etməkdir. "Daxili audit haqqında" Qanun ölkəmizdə daxili auditin təşəkkülü və inkişafı sahəsində mühüm əhəmiyyət kəsb etməklə xarici ölkələrdə dərin maraq doğurmuş və beynəlxalq qurumlar tərəfindən yüksək qiymətləndirilmişdir.
Çıxış edənlər korrupsiyaya qarşı mübarizədə, şəffaflığın artırılmasında daxili auditin əhəmiyyəti və rolundan danışmışlar.
"Azərbaycanda daxili auditin təşəkkülü və inkişaf yolları", "Daxili nəzarət mühitində daxili auditin rolu və əhəmiyyəti", "Daxili audit: müasir problemlərə baxış", "Daxili auditin şəffaflığın artırılmasında rolu", "Bankların informasiya təhlükəsizliyi üzrə nəzarət tədbirləri" və s. mövzularda məruzələr dinlənilmişdir.
Konfransın ikinci günü Daxili Auditorlar İnstitutunun Avropa Konfederasiyası (ECIIA), Auditorlar Palatası və "Audit-Azərbaycan İnstitutu" İctimai Birliyi arasında auditin normativ hüquqi bazasına metodiki təminatına, təşkili və tənzimlənməsinə dair təcrübə mübadiləsi aparılacaqdır.
Tədbir Azərbaycan İqtisadçılar İttifaqı, İqtisadi İnkişaf Nazirliyi, Daxili Auditorlar İnstitutunun Avropa Konfederasiyası (ECIIA), Auditorlar Palatası, "Audit-Azərbaycan İnstitutu" İctimai Birliyi və Azərbaycan Universitetinin birgə təşkilatçılığı ilə baş tutmuşdur.