Cari ilin yanvar-mart aylarında Azərbaycan Respublikası Dövlət Neft Fondunun (ARDNF) büdcə gəlirləri 3 milyard 586,9 milyon manat, büdcə xərcləri isə 1 milyard 919,9 milyon manat təşkil etmişdir.
ARDNF-in mətbuat xidmətindən bildirmişlər ki, ilin birinci rübündə Fondun neft və qaz sazişlərinin həyata keçirilməsi ilə bağlı gəlirləri 3 milyard 352,4 milyon manat, o cümlədən mənfəət neftinin və qazın satışından 3 milyard 349,4 milyon manat, tranzit gəlirləri 1,3 milyon manat, bonus ödənişləri 1,6 milyon manat, xarici sərmayəçilər tərəfindən təhvil verilmiş aktivlərdən 0,1 milyon manat təşkil etmişdir.
Ötən rübdə Neft Fondunun vəsaitlərinin idarə olunmasından əldə olunan gəlirlər 234,5 milyon manata bərabər olmuşdur.
Valyuta məzənnələrinin dəyişməsindən yaranan fərq ilə bağlı Fondun büdcədənkənar gəliri 336,1 milyon manat təşkil etmişdir.
Hesabat dövründə Neft Fondunun 2012-ci il büdcəsinin icrası çərçivəsində 1 milyard 839,8 milyon manat vəsait dövlət büdcəsinə transfert edilmişdir. Qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin həyata keçirilməsinə 48,7 milyon manat, Samur-Abşeron suvarma sisteminin yenidən qurulmasına 20,8 milyon manat vəsait ayrılmışdır. "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"nın maliyyələşdirilməsinə Neft Fondundan 3,7 milyon manat vəsait ayrılmış, "Bakı-Tbilisi-Qars yeni dəmir yolu" layihəsinin maliyyələşdirilməsinə 4,8 milyon manat yönəldilmişdir. Cari ilin birinci rübündə Neft Fondunun idarə edilməsi ilə bağlı xərcləri 2,1 milyon manat olmuşdur.
Aprelin 1-nə Fondun aktivləri ilin əvvəlinə (29 milyard 800 milyon ABŞ dolları) nisbətən 8,6 faiz artaraq 32 milyard 359,4 milyon dollara bərabər olmuşdur. 2012-ci ilin birinci rübündən etibarən Neft Fondu qızılın alınmasına başlamışdır və bu dövrdə qızılın miqdarı 2 ton 804 kiloqram (90 143 unsiya) təşkil etmişdir.

AzərTAc