"Azərsu" Açıq Səhmdar Cəmiyyəti Bakı şəhərində əhalinin içməli su təchizatının yaxşılaşdırılması istiqamətində kompleks tədbirləri davam etdirir. Tədbirlər planına uyğun olaraq paytaxtın 7-ci və 8-ci mikrorayonlarını içməli su ilə təchiz edən magistral su xəttinin bir hissəsinin dəyişdirilməsinə başlanmışdır. 
Xatırladaq ki, Binəqədi mərkəzi nasosxanasından Z.Bünyadov küçəsinə qədər 4 kilometr uzunluğunda metal borulardan ibarət olan magistral su kəmərinin Ə.Rəcəbli küçəsindən keçən 700 metrlik hissəsi korroziyaya uğradığından vaxtaşırı su itkiləri yaranırdı. Hazırda həmin metal borular 900 millimetr diametrlik polietilen borularla əvəzlənir. Bununla paralel olaraq həmin ərazidə yaşayış massivlərini içməli su ilə təmin etmək məqsədilə 300 millimetr diametrlik polietilen borularla 500 metr uzunluğunda köməkçi magistral kəmər də çəkilir. Tədbirlər planına uyğun olaraq tikinti-quraşdırma işlərinin yaxın günlərdə başa çatdırılması nəzərdə tutulur. Bununla da, paytaxtın 7-ci və 8-ci mikrorayonlarının içməli su təchizatı yaxşılaşacaq və su itkilərinin qarşısı alınacaq.

M. YAQUBZADƏ, "Xalq qəzeti"