Azərbaycan qazının dünya bazarlarına çıxarılması üçün nəzərdə tutulan Trans-Anadolu (TANAP) qaz kəməri "Nabucco" layihəsinə qarşı deyil.
APA-nın Türkiyə bürosunun xəbərinə görə, bunu jurnalistlərə açıqlamasında Azərbaycan Dövlət Neft Şirkətinin (ARDNŞ) prezidenti Rövnəq Abdullayev demişdir.
R.Abdullayev Trans-Anadolu qaz kəməri ilə bağlı heç bir maliyyə sıxıntılarının olmadığını vurğulamışdır: "Biz bu layihə ilə qardaş Türkiyənin enerji satışının əsas mərkəzlərindən biri halına gəlməsini qarşıya məqsəd qoymuşuq. Layihənin 80%-lik hissəsi Azərbaycana, 20%-lik hissəsi isə BOTAŞ-TPAO ortaqlığına aiddir. Layihənin maliyyələşməsində heç bir sıxıntımız olmasa da, Azərbaycanda qaz istehsalı sahəsində fəaliyyət göstərən bəzi böyük firmaları da layihənin maliyyələşdirilməsinə cəlb etməyi düşünürük".
ARDNŞ prezidenti TANAP layihəsinin həyata keçirilməsi ilə "Nabucco" layihəsinin gündəlikdən çıxmadığını, əksinə, o layihəni inkişaf etdirəcəyini bildirmişdir.