Bakıda Beynəlxalq Ticarət, İctimai İaşə, Kooperasiya İşçiləri Həmkarlar İttifaqları Konfederasiyasının Səyyar Şurasının iclası keçirilir.
Tədbir iştirakçıları əvvəlcə Fəxri Xiyabana gələrək, görkəmli dövlət xadimi, ulu öndər Heydər Əliyevin xatirəsini ehtiramla yad etmişlər.
Görkəmli oftalmoloq alim, akademik Zərifə xanım Əliyevanın da xatirəsi yad olunmuş, məzarı üzərinə tər çiçəklər düzülmüşdür.
Sonra Şəhidlər Xiyabanında Azərbaycanın azadlığı və suverenliyi uğrunda mübarizədə şəhid olmuş qəhrəman Vətən övladlarının xatirəsi yad edilmişdir. Bakının mənzərəsini seyr edən qonaqlara paytaxtda aparılan abadlıq-quruculuq işləri barədə məlumat verilmişdir.
İclas çərçivəsində Azərbaycan Həmkarlar İttifaqları Konfederasiyasında (AHİK) görüş keçirilmişdir. AHİK-in sədri, Milli Məclisin deputatı Səttar Mehbalıyev demişdir ki, 18 min 610 həmkarlar ittifaqı təşkilatını birləşdirən konfederasiyada həmkarlar ittifaqı üzvlərinin ümumi sayı 1 milyon 600 min nəfərdir. Təşkilat 26 sahə həmkarlar ittifaqı birliyini birləşdirir. S.Mehbalıyev son illər ölkəmizdə aparılan sosial-iqtisadi islahatlar barədə də ətraflı məlumat vermişdir. Bildirmişdir ki, dünyanı bürüyən maliyyə böhranına baxmayaraq, ölkəmizdə həyata keçirilən bütün irimiqyaslı layihələrin icrası uğurla davam etdirilir, işsizliyin sayı ildən-ilə azalır.
Beynəlxalq qurumun sədri Valentina Mitrofanova maliyyə böhranı səbəbindən dünyada bir çox şirkətin fəaliyyətini dayandırmasını işsizliyin artmasına səbəb olduğunu söyləmiş, həmkarlar ittifaqlarının bu məsələnin həllində yaxından iştirak etmələrinin vacibliyini vurğulamışdır. Qonaq Prezident İlham Əliyevin rəhbərliyi altında həyata keçirilən uğurlu sosial-iqtisadi siyasət nəticəsində Azərbaycanın bu böhrandan uğurla çıxdığını qeyd etmişdir. Bakıda aparılan abadlıq-quruculuq işləri Azərbaycanın sosial-iqtisadi inkişafının bir nümunəsi kimi qiymətləndirilmişdir.
AzərTAc