Dekabrın 8-də Azərbaycan Hökuməti və İsveçrə Konfederasiyası Federal Şurası arasında Ticarət və İqtisadi Əməkdaşlıq üzrə Birgə Komissiyanın 5-ci iclası keçirilmişdir.
Azərbaycanın iqtisadi inkişaf naziri Şahin Mustafayev İsveçrə ilə əlaqələrin uğurla inkişaf etdiyini vurğulamışdır.
Nazir bildirmişdir ki, ölkəmiz Avropanın enerji təhlükəsizliyinin təmin olunmasında iştirak etməklə yanaşı, bir sıra beynəlxalq əhəmiyyətli infrastruktur layihələrinin fəal iştirakçısıdır. Bakı-Tbilisi-Ceyhan, Böyük İpək Yolunun bərpası, Şimal-Cənub nəqliyyat dəhlizi, Bakı-Tbilisi-Qars dəmir yolu layihələrinin həyata keçirilməsi Azərbaycanın regional əhəmiyyətli iqtisadi mərkəzə çevrilməsinə səbəb olmuşdur. Xarici investisiyaların cəlb edilməsi üçün ölkədə siyasi və makroiqtisadi sabitlik, davamlı iqtisadi inkişaf təmin olunmuş, əlverişli investisiya mühiti yaradılmışdır.
İsveçrə Konfederasiyasının İqtisadi Məsələlər üzrə Dövlət Katibliyi İdarə heyətinin üzvü, səfir Erik Martin ölkəsinin Azərbaycanla əlaqələrə böyük əhəmiyyət verdiyini və əməkdaşlığın genişləndirilməsində maraqlı olduğunu vurğulamışdır. Səfir İsveçrə iqtisadiyyatının mövcud vəziyyəti, beynəlxalq əlaqələri, ölkəsinin Azərbaycanla iqtisadi əməkdaşlığı barədə məlumat vermişdir.
Tədbirdə Azərbaycanın biznes mühiti və investisiya imkanları ilə bağlı təqdimat olmuşdur.
Sonda iclasın yekunlarına dair protokol imzalanmışdır. Sənədi komissiyanın həmsədrləri - Azərbaycanın iqtisadi inkişaf naziri Şahin Mustafayev və İsveçrə Konfederasiyasının İqtisadi Məsələlər üzrə Dövlət Katibliyi İdarə heyətinin üzvü, səfir Erik Martin imzalamışlar. Protokolda sənaye və energetika, ticarət, investisiya qoyuluşu, kənd təsərrüfatı, bank işi, maliyyə, mədəniyyət, turizm və digər sahələrdə əməkdaşlığın genişləndirilməsi nəzərdə tutulur.
AzərTAc