Azərbaycan Respublikasının sənaye və energetika naziri Natiq Əliyev Pakistan İslam Respublikasının iqtisadi məsələlər və statistika nazirinin müavini Himayətulla Xanın rəhbərlik etdiyi nümayəndə heyəti ilə görüşmüşdür.
Sənaye və Energetika Nazirliyindən bildirmişlər ki, görüşdə Azərbaycan ilə Pakistan arasında iqtisadi əlaqələr, aparılan islahatlar və qarşılıqlı iqtisadi münasibətlər müzakirə edilmiş, iki ölkə arasında neft-qaz və energetika sahəsində əməkdaşlığın perspektivləri barədə fikir mübadiləsi aparılmışdır.
Nazir Natiq Əliyev bildirmişdir ki, Azərbaycan energetika sahəsində zəngin təcrübəyə malikdir və ölkəmiz Pakistanın neft-qaz ehtiyatlarının öyrənilməsi, kəşfiyyatı prosesində fəal iştirak edə bilər.
Eyni zamanda, sənaye və energetika naziri görüşdə Azərbaycanın 20 il ərzində qazandığı nailiyyətlər barədə geniş məlumat vermiş, ümummilli lider Heydər Əliyevin müstəqil dövlətimizin yaranmasında, inkişafında və dünyada tanınmasında misilsiz xidmətlərindən bəhs etmişdir.
Qeyd olunmuşdur ki, belə görüşlər qardaş ölkələrimiz arasında əlaqələrin daha da inkişafı üçün vacibdir və digər sahələrdə olduğu kimi, energetika sahəsində də bu əməkdaşlığın böyük perspektivi vardır.