Azərbaycanın Türkiyədəki səfirliyinin təşəbbüsü ilə Eskişehir Ticarət Palatasında yerli iş adamları ilə keçirilmiş toplantıda Azərbaycanla biznes perspektivləri müzakirə olunmuşdur.
Azərbaycanın Türkiyədəki səfiri Faiq Bağırov Eskişehir valisinin səlahiyyətlərini yerinə yetirən Əkrəm Ballı ilə görüşmüşdür. Görüşdə Türkiyənin mühüm sənaye mərkəzlərindən biri olan Eskişehirlə Azərbaycanın bir şəhərini "qardaşlaşmış şəhərlər" etmək niyyəti açıqlanmış, iqtisadi və mədəni əlaqələrin daha da gücləndirilməsinin zəruriliyi vurğulanmışdır.
Səfir F.Bağırov Eskişehir Ticarət Palatasının fəxri qonaqlar kitabını imzalamışdır. Diplomat bildirmişdir ki, iki qardaş ölkə arasında ən yüksək səviyyədə olan əlaqələr iqtisadiyyat sahəsində də özünü göstərməlidir. Azərbaycanda nəqliyyat, telekommunikasiya, enerji və inşaat sektorlarında Türkiyənin iş adamları ciddi sərmayələr qoymuşlar. Biz Eskişehir iş adamlarının da iqtisadi həyatımızda fəal iştirak etməsini arzu edirik.
Səfir F.Bağırov və Eskişehir Ticarət Palatasının sədri Harun Karacanın sədrlik etdikləri toplantıda çıxış edənlər bildirmişlər ki, dahi şəxsiyyət Heydər Əliyevin söylədiyi kimi, "bir millət, iki dövlət" olan Türkiyə və Azərbaycan arasında iqtisadi əlaqələr gündən-günə inkişaf edir. Bu ilin oktyabrında İzmirdə keçirilmiş Türkiyə-Azərbaycan Yüksək Səviyyəli Əməkdaşlıq Şurasının birinci iclası bu əməkdaşlığın gücləndirilməsində yeni səhifə açmışdır. Qardaş ölkənin ən mühüm iqtisadi mərkəzlərindən biri olan Eskişehirin iş adamları da yaxın zamanda Azərbaycana səfər etmək, ölkəmizdəki həmkarları ilə görüşmək istəyirlər.
Toplantıda Eskişehirdə fəaliyyət göstərən şirkətlərin rəhbərləri öz layihələri və ixracat rəqəmlər barədə Azərbaycan səfirliyinin əməkdaşlarına geniş məlumatlar təqdim etmişlər.

Oqtay BAYRAMOV AzərTAc-ın xüsusi müxbiri
Eskişehir