Noyabrın 28-də ARDNŞ-in baş ofisində qurumun prezidenti Rövnəq Abdullayev İzmir valisi Mustafa Cahit Kıracın başçılığı ilə Bakıda səfərdə olan izmirli iş adamlarından ibarət nümayəndə heyəti ilə görüşmüşdür. 
ARDNŞ-in mətbuat xidmətindən bildirmişlər ki, görüşdə Rövnəq Abdullayev Azərbaycan ilə Türkiyə arasında bütün sahələrdə əməkdaşlığın yüksək səviyyədə inkişaf etməsindən söz açmış, şirkətin təşkilatçılığı ilə bu gün Bakıda keçirilən biznes forumun bu inkişafa yeni töhfə verəcəyinə əminliyini diqqətə çatdırmışdır.
Türkiyənin İzmir vilayətinin valisi Mustafa Cahit Kırac Ege Bölgəsi Sənaye Palatasının məclis üzvlərindən ibarət böyük bir nümayəndə heyətinin Bakıya səfərinin təşkilinə görə ARDNŞ-in prezidentinə təşəkkürünü bildirmişdir. Vali İzmiri "Türkiyənin dünyaya açılan qapısı" kimi qiymətləndirmiş və Türkiyənin iqtisadi inkişafında bu vilayətin mühüm rol oynadığını qeyd etmişdir.
Sonra nümayəndə heyətinin üzvləri ARDNŞ-in Türkiyədəki ən böyük aktivi olan "Petkim" Petrokimya Holdinqinin və onun idarəçiliyini həyata keçirən ARDNŞ-in İzmir vilayətinin sosial-iqtisadi yüksəlişində tutduğu yerdən danışmışlar.
Görüşdə oktyabrın 25-də Azərbaycan Respublikasının Prezidenti İlham Əliyevin və Türkiyə Cümhuriyyətinin Baş naziri Rəcəb Tayyib Ərdoğanın iştirakı ilə Petkim yarımadasında yeni neft emalı zavodunun təməlinin qoyulmasından və Azərbaycan ilə Türkiyə arasında qaz anlaşmalarının imzalanmasından geniş bəhs olunmuş, bu hadisələrin iki qardaş ölkənin gələcəyi üçün böyük əhəmiyyət daşıdığı bildirilmişdir.
TransAnadolu qaz kəməri layihəsi üzərində dayanan R.Abdullayev bu barədə əldə olunmuş razılaşmanın Türkiyənin enerji tranziti ölkəsinə çevrilməsi baxımından xüsusi önəm daşıdığını vurğulamışdır. ARDNŞ-in prezidenti, həmçinin yaxın dövrdə Petkimdə həyata keçirilməsi planlaşdırılan işlərdən də geniş söz açmışdır.
Görüşün sonunda İzmir Valiliyi və Ege Bölgəsi Sənaye Palatası adından ARDNŞ-in prezidenti R.Abdullayevə, ARDNŞ adından isə nümayəndə heyəti üzvlərinə xatirə hədiyyələri təqdim edilmişdir.
AzərTAc