2011-ci il oktyabrın 1-i tarixinə olan statistikaya əsasən, bu ilin əvvəli ilə müqayisədə Dövlət Sosial Müdafiə Fondunun fərdi uçot sistemində şəxsi hesabı olan sığortaolunanların sayı 7,23 faiz artmışdır. Belə ki bu ilin 9 ayı ərzində DSMF tərəfindən əlavə olaraq 130 218 sığortaolunana fərdi şəxsi hesab açılmışdır. Nəticədə Azərbaycanda fərdi şəxsi hesabı olan sığortaolunanların sayı 1 930 670 nəfərə yüksəlmişdir.
Fərdi uçot Azərbaycan Respublikası qanunvericiliyinə uyğun əmək pensiyalarının və digər sosial müdafiə hüquqlarının təmin edilməsi üçün hər bir sığortaolunan haqqında məlumatların uçotunun təşkili və aparılmasıdır. 2006-cı il 1 yanvar tarixindən tətbiq olunan "Əmək pensiyaları haqqında" Azərbaycan Respublikasının Qanununa əsasən, əmək pensiyaları fərdi hesaba toplanan pensiya kapitalına əsasən hesablanır.
Azərbaycan Respublikası Dövlət Sosial Müdafiə Fondunun ictimaiyyətlə əlaqələr sektorundan redaksiyaya daxil olan məlumatda bildirilir ki, dövlət sosial sığorta sistemində fərdi şəxsi hesabı olan sığortaolunanlar arasında kişilər çoxluq təşkil edir. Onların sayı 1 079 495 nəfərdir. Fərdi şəxsi hesabı olan sığortaolunanların 851 175 nəfəri isə qadındır.
Fərdi şəxsi hesabı olanlar arasında yaşları 40 ilə 50 aralığında sığortaolunanlar ümumi sığortaolunanların 476 736 nəfərini əhatə edir. Bundan başqa, fərdi uçot sistemində 30 yaşa kimi sığortaolunan vətəndaşlar 412 398 nəfər, 30 yaşdan 40 yaşa kimi sığortaolunanlar isə 439 502 nəfərdir. Yaşları 50 ilə 60 arasında olan sığortaolunanlar 412 400 nəfər, yaşı 60 yaşdan yuxarı olan sığortaolunanların sayı isə 189 634 nəfərdir.
Hazırda Dövlət Sosial Müdafiə Fondu tərəfindən "2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı"na uyğun olaraq fərdi uçotun tətbiq dairəsinin genişləndirilməsi üçün müvafiq tədbirlər davam etdirilməkdədir.

Z.BƏŞİRQIZI, "Xalq qəzeti"