Azərbaycan, Gürcüstan, Ukrayna və Moldova Varşava görüşündə Avropa İttifaqı ilə əməkdaşlığı genişləndirmək və enerji layihələrini inkişaf etdirmək barədə razılığa gəlmişlər. Moldovanın xarici işlər və Avropaya inteqrasiya məsələləri üzrə naziri Yuri Lyanke bu məlumatı GUAM üzvü olan ölkələrin XİN rəhbərlərinin Varşavada "Şərq tərəfdaşlığı" sammiti çərçivəsində keçirilmiş görüşündən sonra vermişdir.
"Aİ ilə hərtərəfli əməkdaşlığın dərinləşdirilməsi və genişləndirilməsi ölkələrimizin prioritetidir", - deyən Y.Lyanke vurğulamışdır ki, GUAM Aİ ilə kooperasiyaya daxil olmadan onun mövcudluğu və inkişafı qeyri-mümkündür.
O demişdir ki, iqtisadi əlaqələrin genişlənməsi, o cümlədən sərbəst ticarət zonaları yaradılmasının davam etdirilməsi, nəqliyyat dəhlizi konsepsiyasının həyata keçirilməsi, birgə turizm layihələrinin təşkil edilməsi, habelə regional enerji proqramlarının reallaşdırılmasında GUAM-ın rolunun artırılması üzv ölkələrin qarşılıqlı fəaliyyətinin mühüm elementi olmalıdır.
Nazirin sözlərinə görə, Azərbaycan, Gürcüstan, Ukrayna və Moldova bu təşkilatın daxilində sıx qarşılıqlı fəaliyyəti və əməkdaşlığı davam etdirmək barədə razılığa gəlmişlər. Y.Lyanke energetika sektorunda yeni perspektivlər barədə söhbət açaraq bildirmişdir ki, üzv ölkələr üçün çox səmərəli olan ümumi enerji layihələrinin həyata keçirilməsinə dair dialoq aparılır.
GUAM-ın baş katibi Valeri Çeçelaşvili vurğulamışdır ki, GUAM-ın ərazisi o qədər də böyük deyil, lakin xəritəyə nəzər salsaq, bu ərazi Aİ ilə əməkdaşlıq şəraitində yaradılan "Cənub axını" layihəsinin bir hissəsidir. Baş katib çıxışının sonunda demişdir: "Energetik kooperasiya ölkələrimizin enerji təhlükəsizliyinin təmin edilməsi sahəsində böyük perspektivlərə malikdir".

AzərTAc