Azərbaycan Sənaye və Energetika Nazirliyi ilə Koreya Respublikası hökuməti tərəfindən maliyyələşdirilən Koreya Beynəlxalq Əməkdaşlıq Agentliyi (KOİCA) arasında Azərbaycan sənayesinin qeyri-neft sektorunun inkişafı üzrə proqramın hazırlanması istiqamətində "Ümumdünya dost məsləhətləri" proqramı çərçivəsində məsləhət xidmətinin göstərilməsi barədə razılığa gəlinmişdir. 
Nazirlikdən bildirmişlər ki, bununla bağlı KOİCA-nın ölkəmizdəki rezident nümayəndəsi Kim Yang-Vu və Azərbaycana ezam edilmiş mütəxəssis Kap Soo Yong sənaye və energetika nazirinin müavini Gülməmməd Cavadov ilə görüşmüşlər. Nazirliyin aidiyyəti strukturları rəhbərlərinin də iştirak etdiyi görüşdə sənayenin hazırkı vəziyyəti barədə məlumatlar verilmiş və qarşıda duran məsələlər müzakirə edilmişdir.
Koreyalı mütəxəssis Kap Soo Yong bir il müddətində Azərbaycanda olacaq və ölkəmizin müvafiq qurumlarının mütəxəssisləri ilə birlikdə "Sənayenin inkişafı Proqramı"nın hazırlanması üzrə çalışacaqdır.