Ötən payızda fermerlər və fərdi torpaq sahibkarları əkdikləri 933233 hektar arpa və buğda sahələrinin 915648 hektarında məhsul yığımını başa çatdırmışlar. İndi kombaynlar yüksək dağlıq ərazilərdə işləyir. Daşkəsən və Gədəbəy rayonlarında hələ də biçinə başlanılmayıb. Taxılçılıqla məşğul olan 60 rayondan 41-də zəmilərin biçini qurtarıb. Dövlət Statistika Komitəsinin hazırladığı məlumata görə, avqust ayının 1-dək ölkə üzrə hər hektardan orta hesabla 24,7 sentner məhsul götürülməklə 2 milyon 257 min 395 ton taxıl tədarük edilmişdir. Bu, keçənilki göstəricilərdən müvafiq olaraq 4,8 sentner və 423 min ton çoxdur. Buna baxmayaraq, 10 rayon taxıl istehsalını keçən ildəkinə nisbətən azaltmışdır.
Ölkə üzrə bu il ən yüksək nəticə Şəki rayonunda əldə edilmişdir. Burada indiyədək 71585 hektar taxıl sahəsinin 70380 hektarında biçin aparılmışdır. Hər hektardan 33,4 sentner məhsul yığan fermerlər və fərdi torpaq sahibkarları arpa və buğda istehsalını 235254 tona çatdırmışlar. Biçinin sonunadək bu göstərici bir qədər də artacaqdır. Hələlik Şəki rayonunun taxılçıları məhsul istehsalını keçən ildəkinə nisbətən 100 min tondan çox artırmaqla rekord nəticə qazanmışlar.
Cari ildə Cəlilabad rayonunun kənd adamları da nümunəvi işləyirlər. Onlar təsərrüfatın başqa sahələrində olduğu kimi, taxılçılıqda da yüksək nəticələrə nail olurlar. Rayonda bu il arpa və buğda tədarükü 114210 tona çatdırılmışdır ki, bu da keçən ilki göstəricini 27 min ton üstələyir. Ümumi taxıl istehsalının miqdarına görə respublikada üçüncü yeri Neftçala rayonunun taxılçıları tuturlar - 101580 ton, 100 min tonluq həddə çatmağa Naxçıvan Muxtar Respublikası fermerlərinin və fərdi torpaq sahibkarlarının da yaxşı imkanları var. Muxtar respublikada avqustun 1-dək 94296 ton taxıl tədarük olunmuşdur. Burada hər hektardan 28,3 sentner məhsul yığılıb. Məhsulu biçilməmiş 3,5 min hektara yaxın zəmi qalır.
Ağcabədi, Ağsu, Beyləqan, Biləsuvar, Füzuli, Goranboy, Xaçmaz, İsmayıllı, Kürdəmir, Qəbələ, Qusar, Saatlı, Sabirabad, Şəmkir rayonları hərəyə 50-80 min ton arasında taxıl istehsal etmişlər. Hər hektardan ən yüksək məhsuldarlıq şəmkirli fermerlərə məxsusdur - 38,8 sentner. Bu göstəriciyə görə, ikinci yerdə 33,6 sentner nəticə ilə Saatlı rayonu gedir. Şəki, Samux, Sabirabad, Beyləqan, Yevlax rayonlarının mexanizatorları da hər hektardan 30 sentnerdən yuxarı məhsul yığmışlar.
Qiymətli ərzaq məhsulu olan buğda istehsalında əldə edilən nəticələr hamını sevindirir. İndiyədək tədarük olunan ümumi taxılın 1 milyon 621 min 384 tonunu buğda təşkil edir ki, bu da keçən ildəki göstəricidən 322 min ton çoxdur. Buğda istehsalında da Şəki rayonunun taxılçıları nümunəvi işləyiblər. Onlar indiyədək anbarlara 157968 ton qiymətli ərzaq məhsulu yığıblar. Cəlilabadlılar da buğda istehsalında 101406 tonluq nəticə göstəriblər. Daha beş rayon hərəyə 50 min tondan yuxarı buğda istehsal edib.
Taxılçılar bu il qazandıqları nailiyyətlə öyünə bilərlər. Ancaq bu, onları arxayınlaşdırmamalıdır. Əksinə, fermerlər və fərdi torpaq sahibkarları payız əkininə daha mütəşəkkil, nümunəvi hazırlıq görməlidirlər ki, gələn ilin məhsulunun bünövrəsini möhkəm qoysunlar və Azərbaycanda taxıl istehsalını 3 milyon tona çatdırsınlar. Bu məqsədi reallaşdırmaq üçün onların hər cür imkanları və şəraitləri var.

Telman ƏLİYEV, "Xalq qəzeti"