"Paşa Sığorta" şirkəti "Muğan Bank"ın korporativ tibbi sığortaçısının müəyyən olunmasına dair müsabiqənin qalibi elan olunmuşdur. Seçimin nəticələri ilə bağlı müqavilə tərəflər arasında keçən həftə bağlanmışdır. "Muğan Bank"ın tibbi sığorta proqramı Bakı və ölkənin digər şəhərlərində çalışan bank və inzibati qulluqçuların müxtəlif kateqoriyaları daxil olmaq şərti ilə bankın bütün işçilərini əhatə edir. 
"Paşa Sığorta" ASC-nin İdarə Heyəti sədrinin müavini Ülviyyə Cabbarova müqavilənin imzalanmasını belə şərh etmişdir: "Bu gün iri sənaye və xidmət müəssisələri ilə yanaşı, Paşa Sığorta-nın tibbi sığorta üzrə müştəriləri siyahısında "Paşa Bank", "AccessBank", "Bank Avrasiya" və "United Credit Bank" kimi bank institutları mövcuddur. İri banklardan sayılan "Muğan Bank"ın "Paşa Sığorta"nı tibbi sığortaçı qismində seçməsini biz "Paşa Sığorta"nın risklərin qiymətləndirilməsi və şirkətin Tibbi Sığorta Xidmətinin müştərilərin maraqlarına yüksək dərəcədə cavab verməsi üzrə siyasətin düzgün qurulması kimi qəbul edirik. Biz əminik ki, bizim keyfiyyət göstəricilərimiz müqavilə imkanları çərçivəsində "Muğan Bank"ın əməkdaşlarının məmnunluğunu təmin edəcək və bizim şirkətlər arasında uzunmüddətli əlverişli əməkdaşlıq üçün zəruri baza yaradacaqdır".
Çoxprovayderli xidmət modeli üzərində qurulmuş "Paşa Sığorta"nın Korporativ Tibbi Sığorta Proqramı tibbi sığorta çərçivəsində müştərilərin müraciətlərinə gün ərzində fasiləsiz təminatı həyata keçirir və qabaqcıl tibb müəssisələrində və aptek şəbəkələrində müştərilərə göstərilən tibbi yardımın keyfiyyətinə nəzarət edir. 2007-ci ildən etibarən "Paşa Sığorta"nın əməliyyat sistemi Tibbi Sığorta Xidməti daxil olmaqla sığorta məhsulları və xidmətlərinin idarə edilməsinin ISO 9001:2008 strandartlarına uyğun olmasına görə Britaniya agenti Moody International tərəfindən sertifikatla təltif olunmuşdur.