İyulun 21-də Azərbaycan Nazirlər Kabinetində Almaniya nümayəndə heyəti ilə iki ölkə arasında əməkdaşlıq məsələləri müzakirə olunmuşdur.
Görüşdə Baş nazirin müavini Abid Şərifov son illər ölkəmizdə həyata keçirilən irimiqyaslı layihələr barədə məlumat vermişdir. Bildirilmişdir ki, 1994-2010-cu illərdə Azərbaycana maliyyə və texniki əməkdaşlıq çərçivəsində Almaniya hökuməti tərəfindən 138,75 milyon avro kredit və 45,28 milyon avro texniki yardım (qrant) ayrılmışdır. Azərbaycan ilə Almaniya arasında 1994-cü ildən başlayan maliyyə əməkdaşlığı çərçivəsində 18 layihənin reallaşdırılması barədə razılıq əldə edilmişdir. Bu layihələrdən səkkizinin icrası başa çatmış, digərləri isə uğurla davam etdirilir.
İcrada olan layihələr üçün ümumilikdə 100,9 milyon avro, o cümlədən 83,48 milyon avro kredit və 17,38 milyon avro texniki yardım ayrılmışdır. A.Şərifov bu layihələr sırasında Gəncə və Şəki şəhərlərinin su təchizatı və kanalizasiya sistemlərinin yenidən qurulmasının xüsusi əhəmiyyət kəsb etdiyini diqqətə çatdırmışdır.
Almaniyanın İqtisadi İnkişaf və Əməkdaşlıq Nazirliyinin 4-cü Baş İdarəsinin rəisi Fridel Eggelmeyer Azərbaycana ilk dəfə səfər etdiyini vurğulayaraq respublikamızın son illərdə əldə etdiyi nailiyyətləri yüksək qiymətləndirmişdir. Azərbaycanın sosial-iqtisadi infrastrukturunun inkişafına Almaniyanın hər zaman kömək göstərməyə hazır olduğunu deyən qonaq gələcəkdə də bir sıra layihələrin birgə reallaşdırılması istiqamətində mövcud əməkdaşlığın davam etdirilməsinin vacibliyini qeyd etmişdir. Azərbaycanın təkcə neft və qazla zəngin olmadığını vurğulayan F.Eggelmeyer ölkəmizin gözəl təbiətinə, işgüzar və səmimi insanlarına heyranlığını bildirmişdir. Almaniyada keçirilmiş "Eurovision-2011" mahnı müsabiqəsində ölkəmizi təmsil edən duetin birinci olmasını böyük uğur adlandırmışdır.
İclasda qarşılıqlı maraq doğuran məsələlər ətrafında fikir mübadiləsi aparılmışdır.{nl}