Mərkəzi Bankdan verilən məlumata görə, bankın sədri Elman Rüstəmovun iştirakı ilə Strateji Planın AMB-nin əməkdaşları üçün geniş təqdimatı keçirilmişdir.
Təqdimatda qeyd edilib ki, Mərkəzi Bankın indiyə qədər əldə etdiyi uğurlarda və onun institusional potensialının inkişafında strateji planlaşdırma mühüm rol oynamışdır. Bankda müasir idarəetmə sistemi və ənənələri formalaşmış, bütün funksional fəaliyyət istiqamətlərində müvafiq biznes prosesləri, yaradıcı və intellektual iş mühiti yaradılmış, peşəkar kadrlar hazırlanmışdır.
Son illər ölkədə yüksək iqtisadi inkişaf dinamikası, maliyyə sisteminin sürətlə böyüməsi, dəyişən və mürəkkəbləşən qlobal iqtisadi mühit bank qarşısında yeni tələblər qoyur. Məhz bu yeni tələblərin effektiv cavablandırılması üçün bank bir sıra istiqamətlərdə - makroiqtisadi sabitliyin, bank sistemində maliyyə sabitliyinin qorunması, əsas missiyaya xidmət edən funksiyaların əsaslı müasirləşdirilməsi, institusional idarəetmənin ən müasir təcrübəyə uyğunlaşdırılması, insan kapitalının inkişafı, iqtisadi inkişafa dəstəyin artırılması istiqamətlərində yeni strateji fəaliyyət prioritetləri müəyyən etmişdir.
Strateji Plan 2011-2014-cü illər üçün bankın qarşısına doqquz strateji hədəf qoyur və həmin hədəflər Mərkəzi Bankın ölkədə makro-iqtisadi sabitliyi və davamlı iqtisadi inkişafı dəstəkləyən mühüm dövlət institutuna çevrilməsinə imkan yaradacaq.{nl}